Luis Suárez heldur á heimahagana

Suárez var seldur frá Nacional til hollenska félagins Groningen árið 2006 en hann hefur leikið í 16 ár í Evrópu með Ajax, Liverpool, Barcelona og Atlético Madrid. 

Þessi 35 ára gamli framherji rann út á samningi hjá Atlético Madrid í sumar og var í kjölfarið orðaður við félög í MLS-deildinni, River Plate og nú síðast Borussia Dortmund. 

„Ég er nálægt því að ganga endanlega frá samningi mínum við Nacional og vonast til þess að klára þau smáatriði sem á eftir að semja um sem allra fyrst. 

Þetta er tilboð sem ég get ekki hafnað og ég er mjög spenntur að koma aftur á staðinn þar sem þetta byrjaði allt saman," sagði Suárez í myndskeiðinu þar sem hann færði stuðningsmönnum úrúgvæska félagsins þessi gleðitíðindi.