Svokölluð vandræðalán, flokkur sem nær bæði yfir lán sem hafa verið í vanskilum í meira en 90 daga og önnur lán í áhættustigi 3, námu 2,1 prósenti af lánasafni bankans í lok árs 2019. Hlutfallið var komið niður í 1,7 prósent í lok árs 2021 og hefur haldið áfram að lækka á þessu ári. Það stendur nú í 1,6 prósentum.
„Vinsældir óverðtryggðra lána halda áfram að aukast á sama tíma og vanskilahlutföll hafa aldrei verið lægri,“ segir í uppgjörskynningu bankans. Þá er jafnframt haft eftir Lilju Björk Einarsdóttur, bankastjóra Landsbankans, að almennt sé staða lántaka „mjög góð og lítið um vanskil.“
Í fundargerð fjármálastöðugleikanefndar Seðlabanka Íslands frá því í júní kom fram að útlánagæði hefðu almennt aukist og vanskil minnkað. „Þær aðgerðir sem Seðlabankinn og stjórnvöld gripu til í farsóttinni skiluðu árangri og drógu úr neikvæðum efnahagslegum áhrifum á heimili og atvinnulíf í landinu,“ sagði í fundargerðinni og voru nefndarmenn sammála um að bankakerfið stæði traustum fótum.
Veruleg ósókn hefur verið í óverðtryggð íbúðalán á föstum vöxtum samhliða vaxtandi verðbólgu og hækkandi vaxtastigi. Á einu og hálfu ári, þ.e. frá árslokum 2020, hefur þetta lánaform farið úr því að vera 12 prósent af íbúðalánasafni Landsbankans og upp í 42 prósent.
Á sama tíma hefur vægi óverðtryggðra íbúða lána með breytilegum vöxtum minnkað úr 49 prósentum í 33 prósent og vægi verðtryggðra lána með breytilegum vöxtum minnkað úr 32 prósentum í 20 prósent.
Tölur Seðlabanka Íslands varpa einnig ljósi á tilfærsluna úr breytilegum vöxtum yfir í fasta í bankakerfinu í heild sinni. Óverðtryggð lán með breytilegum vöxtum voru 34 prósent af öllum íbúðalánum í maí 2021 en lán með föstum vöxtum 15 prósent. Vægi hvors lánaforms stendur nú í 28 prósentum.
