Viðskipti erlent

Musk vill hætta við en Twitter ætlar í mál

Samúel Karl Ólason skrifar
Elon Musk hefur skrifað undir kaupsamning en vill nú fá hann felldan úr gildi.
Elon Musk hefur skrifað undir kaupsamning en vill nú fá hann felldan úr gildi. Getty/Matt Cardy

Auðjöfurinn Elon Musk segir að hann vilji hætta við að kaupa samfélagsmiðilinn Twitter á 44 milljarða dala. Forsvarsmenn fyrirtækisins segjast ætla að höfða mál gegn Musk og segjast vongóðir um að þeir muni bera sigur úr bítum.

Musk skrifaði undir kaupsamning í maí en hann á fyrir 9,2 prósent í Twitter. Lauslega reiknað samsvara 44 milljarðar dala um sex billjónum króna.

Í bréfi sem Musk hefur sent til forsvarsmanna Twitter segir hann fyrirtækið ekki hafa staðið við kaupsamninginn með því að útvega honum ekki nánari upplýsingar um raunverulegan fjölda falskra reikninga og svokallaðra botta á samfélagsmiðlinum.

Eins og fram kom í frétt Vísis í gær hafa forsvarsmenn Twitter lengi sagt að fjöldi þessara reikninga samsvari um fimm prósentum af um 230 milljónum daglegum notendum samfélagsmiðilsins. Musk hefur dregið það í efa og sakað Twitter um að veita sér ekki nægjanlega góðar upplýsingar.

Musk og hans fólk segir ekki hægt að meta raunverulegt verðmæti Twitter án þessara upplýsinga.

Forsvarsmenn Twitter sögðu frá því í gær að um milljón falskir reikningar og bottar væru fjarlægðir af samfélagsmiðlinum á degi hverjum. Bottarnir væru mun færri en fimm prósent heildarnotenda en til að fá það hlutfall út, greina starfsmenn fyrirtækisins þúsundir reikninga sem valdir eru að handahófi.

Bret Taylor, stjórnarformaður Twitter, tísti um ákvörðun Musks fyrir skömmu og sagði að stjórnin ætlaði sér að tryggja að kaupsamningnum yrði framfylgt og að dómsmál yrði höfðað gegn Musk.

Jafnvel þó Musk takist að sannfæra dómara um fella kaupsamninginn niður gæti hann þurft að greiða Twitter einn milljarð dala.

Allt frá því hann gerði upprunalegt kauptilboð sitt í Twitter hafa verið uppi efasemdir um að Musk hafi raunverulega ætlað sér að kaupa samfélagsmiðilinn. Stærstur hluti auðæfa hans er bundinn í hlutabréfum og hafa lækkanir á mörkuðum komið niður á sjóðum hans. Þá hefur virði Twitter einnig lækkað og hefur það að hluta til verið rakið til ummæla Musks.

Eins og bent er á í frétt AP fréttaveitunnar er virði hlutabréfa Twitter nú 36,81 dalir. Samkvæmt kauptilboðinu sem Musk skrifaði undir á hann að kaupa hlutinn á 54,2 dali.


Tengdar fréttir

Kaup Musks á Twitter sögð „í hættu“

Kaup auðjöfursins Elons Musk á samfélagsmiðlinum Twitter eru sögð í hættu. Musk heldur því fram að ekki sé hægt að sannreyna tölur Twitter um fjölda falskra reikninga og svokallaðra botta á samfélagsmiðlinum og er auðjöfurinn sagður vera hættur viðræðum um fjármögnun kaupanna.

Ætla að láta Musk standa við gerðan samning

Stjórn samfélagsmiðilsins Twitter segist ætla að láta Elon Musk standa við gerðan samning um kaup hans á miðlinum fyrir 44 milljarða dollara. Musk reynir nú að nota hlutfall gervireikninga á Twitter til að gera breytingar á samningnum eða komast undan honum.

Musk skapar enn meiri vafa um kaupin á Twitter

Kaup auðkýfingsins Elons Musk á samfélagsmiðlinum Twitter eru nú í lausu lofti eftir að hann byrjaði að efast um tölur stjórnenda Twitter um hversu hátt hlutfall reikninga eru gervireikningar eða yrki (e. bot). Hann vill greiða minna en tilboðið sem hann lagði fram í síðasta mánuði.

Musk segir Twitter-kaupin í bið

Elon Musk, auðugasti maður heims, segir kaup hans á samfélagsmiðlinum Twitter vera í bið. Það sé á meðan verið sé að ganga úr skugga um hve margir falskir reikningar og ruslpóstsbottar séu í rauninni.

Fáránlega ríkur maður með takmarkaðan skilning á málfrelsi

Kaup Elon Musk á samfélagsmiðlinum Twitter hafa vakið mikil viðbrögð um allan heim. Milljarðamæringurinn segist ætla að efla tjáningarfrelsi á miðlinum og útrýma gervimennum. Sérfræðingar setja stórt spurningamerki við þær fyrirætlanir.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×