Anníe Mist útskýrir af hverju hún blótar svona mikið í nýju CrossFit myndinni

Ekki það að hún hafi hætt að brosa, það gerir hún aldrei, heldur miklu frekar að við fáum að heyra aðeins öðruvísi orðaval en við erum vön að heyra hjá CrossFit goðsögninni.

Árangur hjá Anníe Mist á heimsleikunum í fyrra verður lengi í minnum hafður enda komst hún á verðlaunapallinn innan við ári eftir að hún eignaðist dóttur sína.

Það þurfti alvöru hörku og keppnisskap til að komast alla leið á pall sérstaklega miðað við hvað fæðingin reyndist henni erfið.

Anníe Mist varar fylgjendur sína við því í nýrri færslu á samfélagsmiðlum sínum að þeir fái aðeins aðra mynd af henni í þessari nýju mynd sem er um heimsleikana í fyrra.

„Þau sem þekkja mig vita það vel að ég blóta ekki mikið, sérstaklega ekki á íslensku en ef þið horfið á þessa nýju mynd þá heyrið þið mig blóta talsvert mikið,“ skrifaði Anníe Mist Þórisdóttir í færslu á Instagram reikningi sínum.

„Ég skrifa þetta hundrað prósent á það hvernig ég var að reyna að herða mig upp og halda mér við efnið á meðan ég var að keppa. Ef þér finnst þú ekki vera hörð eða harður af þér á dugar kannski að þykjast vera það,“ skrifaði Anníe.

„Ég vil bara biðjast afsökunar á blótinu en það borgaði sig,“ skrifaði Anníe og deildi síðan skilaboðunum sem hún fékk frá íþróttasálfræðingnum sínum á föstudagsmorguninn á heimsleikahelginni í fyrra.

Anníe Mist vonast til að hjálpa öðrum að herða sig upp með því að lesa það alveg eins og hún gerði fyrir tæpu ári síðan.

Það má sjá færsluna og skilaboðin frá íþróttasálfræðingum hennar hér fyrir ofan.