Þrír mánuðir fyrir kyn­ferðis­lega á­reitni

Maðurinn var sakfelldur fyrir kynferðislega áreitni með því að hafa teygt sig inn um glugga bifreiðar konunnar og strokið henni utanklæða eftir upphandlegg og læri og að hafa inni í bifreiðinni strokið henni utanklæða á hendur, bak, læri og mjaðmir og kysst hendur hennar, að því er segir í dómi Landsréttar.

Í niðurstöðukafla dómsins segir að framburður konunnar hafi verið metinn trúverðugur sem og að vitnisburður þriðja manns hafi verið talinn renna stoðum undir frásögn konunnar. Þá sýndi myndbandsupptaka úr öryggismyndavél konuna bægja sér frá tilraun mannsins til að klípa hana í rassinn þegar út úr bílnum var komið.

Konan krafðist 2,5 milljóna króna í miskabætur en Landsréttur dæmdi manninn til greiðslu aðeins hluta kröfunnar eða fjögur hundruð þúsund króna. Þá var honum gert að greiða allan áfrýjunarkostnað málsins um ríflega 1,3 milljón króna. Í héraði hafði maðurinn verið dæmdur til greiðslu rúmlega 1,6 milljónar króna í málsvarnarlaun verjanda síns, þóknun réttargæslumanns og annan sakarkostnað.