Félag sem fjárfestir í rafmyntum fær heimild hjá Seðlabankanum
Ritstjórn Innherja skrifar
Sex manna teymi stendur að baki Visku Digital Assets.
Fjármálaeftirlit Seðlabanka Íslands hefur skráð félagið Viska Digital Assets, sem er að setja á fót fagfjárfestasjóð með áherslu á rafmyntir og bálkukeðjutækni, sem rekstraraðila sérhæfðra sjóða.
Fjármálaeftirlitið telur félagið uppfylla skilyrði fyrir skráningunni en í henni felst heimild til að stýra sérhæfðum sjóðum að því gefnu að verðmæti heildareigna í rekstri Viska Digital Assets fari ekki umfram þau mörk sem kveðið er á um í lögum.
Sex manns standa að stofnun Visku Digital Assets en sá sem stýrir félaginu er Daði Kristjánsson, en hann lét af störfum hjá Fossum mörkuðum í byrjun þessa árs.
Við það tilefni sagðist hann hafa varið stórum hluta af frítíma sínum síðustu ár til að kynna sér bálkakeðjutækni og fjárfest í rafmyntum. „Þetta er ört vaxandi eignaflokkur þar sem ég sé mikil tækifæri á næstu árum,“ var haft eftir Daða.
Teymi Visku Digital Assets samanstendur að auki af þeim Daníel Fannari Jónssyni, sem er jafnframt stjórnarformaður, Kristjáni Inga Mikaelssyni, Guðlaugi Steinarr Gíslasyni, Jóni Þórarni Úlfssyni og Gunnlaugi Jónssyni.
Internetið gjörbreytti upplýsingamiðlun og samskiptum okkar til framtíðar. Í dag stöndum við frammi fyrir annarri byltingu með tilkomu bálkakeðjutækni. Á sama hátt og internetið breytti upplýsingamiðlun og samskiptum þá mun bálkakeðjutæknin gjörbylta skráningu og umsýslu verðmæta.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
