Viðskipti innlent

Strandveiðisjómenn landa 275 þúsund króna aflaverðmæti að jafnaði úr róðri

Kristján Már Unnarsson skrifar
Frá höfninni á Drangsnesi við Steingrímsfjörð.
Frá höfninni á Drangsnesi við Steingrímsfjörð. Vilhelm Gunnarsson

Mánuði eftir að strandveiðar hófust er búið að veiða um 35 prósent kvótans. Aflinn nemur samtals 3.672 tonnum en strandveiðipottur sumarsins er tíu þúsund tonn af þorski. Auk þess hafa veiðst 353 tonn af ufsa, samkvæmt samantekt Fiskistofu í morgun.

Mikill afli og hátt fiskverð fara saman þetta vorið. Þannig nemur meðalafli á bát í hverjum róðri 712 kílóum eftir maímánuð. Það er 14 prósentum meira miðað við maímánuð í fyrra, samkvæmt úttekt á heimasíðu Landssambands smábátaeigenda.

Meðalverð fyrir óslægðan þorsk á markaði var í dag 400 krónur á kíló. Meðalverð maímánaðar var hins vegar 387 krónur, miðað við 286 krónur í sama mánuði í fyrra, sem er 35 prósenta hækkun milli ára. Það þýðir að hver róður á strandveiðunum var að skila aflaverðmæti upp á 275 þúsund krónur að jafnaði á hvern bát.

Verð á ufsa hefur hækkað enn meira, eða um 106 prósent milli ára, var núna 189 krónur á kíló miðað við 92 krónur í fyrra. Ufsaafli dregst ekki frá hámarkskvóta dagsins, telst svokallaður vs-afli, en strandveiðisjómenn þurfa að greiða 20 prósent af andvirði hans í Verkefnasjóð sjávarútvegs. Ufsinn telst engu að síður góð búbót á strandveiðunum.

Aflahæstu bátar hvers svæðis eftir maímánuð eru:

Svæði A: Grímur AK með 15.771 kíló, Kolga BA með 12.758 kíló og Doddi SH með 12.481 kíló.

Svæði B: Fengur ÞH með 9.349 kíló, Gulltindur ST með 9.263 kíló og Blíðfari ÓF með 9.246 kíló.

Svæði C: Máney SU með 14.651 kíló, Jón Jak ÞH með 11.006 kíló og Lundey ÞH með 10.162 kíló

Svæði D: Nökkvi ÁR með 17.763 kíló, Dögg SF með 16.003 kíló og Benni SF með 15.359 kíló.

Samkvæmt upplýsingum Fiskistofu eru 644 bátar komnir með strandveiðileyfi. Af þeim eru 611 búnir að landa afla.


Tengdar fréttir

Komast ekki til strandveiða vegna þungatakmarkana á þjóðveginum

Strandveiðarnar hófust í morgun og er búist við að um og yfir sjöhundruð bátar stundi veiðarnar þetta sumarið. Í Norðurfirði á Ströndum, einni aflahæstu höfninni, neyddust sjómenn þó til að fresta brottför þar sem þungatakmarkanir á þjóðveginum norður í Árneshrepp meina flutningabílum að sækja aflann.

Hann landaði 32 kílóa skrímsli á Bakkafirði

Bakkafjörður er orðinn einn vinsælasti útgerðarstaður strandveiðisjómanna. Þar landa þeir stórþorski sem þeir veiða við Langanes og fagna mun hærra fiskverði en í fyrra.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.