Formúla 1

„Við verðum áfram ástfangnir, er það ekki?“

Valur Páll Eiríksson skrifar
Þeir félagar hafa litlar áhyggjur af því að sambandið súrni.
Þeir félagar hafa litlar áhyggjur af því að sambandið súrni. Clive Mason/Getty Images

Liðsfélagarnir Max Verstappen og Sergio Pérez í liði Red Bull í Formúlu 1 gefa lítið fyrir það að möguleg barátta um heimsmeistaratitilinn ógni vináttu þeirra. Pérez vann frækinn sigur í Mónakó um helgina.

Pérez vann aðeins sinn þriðja sigur á ferlinum í Mónakó og sinn fyrsta sigur á tímabilinu. Pérez hóf keppnina þriðji á ráslínu en góð keppnisáætlun Red Bull, auk mistaka í röðum Ferrari, hleyptu honum framúr Ferrari-mönnunum Charles Leclerc og Carlos Sainz, sem hófu keppnina fyrir framan hann.

Pérez lét forystu sína aldrei af hendi og fékk mikilvæg 25 stig í keppni ökuþóra á meðan félagi hans, heimsmeistarinn Max Verstappen, varð þriðji. Sigur Pérez hleypti honum óvænt inn í keppni um heimsmeistaratitilinn þar sem hann er með 110 stig í þriðja sæti, aðeins sex stigum á eftir Leclerc og 15 stigum á eftir Verstappen sem leiðir með 125 stig.

Liðsfélagarnir voru spurðir eftir kappaksturinn hvort möguleg keppni þeirra um titilinn myndi hafa súr áhrif á þeirra samband.

„Ég held ekki að neitt breytist,“ sagði Verstappen áður en Pérez, glottandi við, greip orðið: „Við verðum áfram ástfangnir, er það ekki?“

„Já, algjörlega. Af hverju ætti það að breytast?“ sagði Verstappen þá.

Það yrði engin nýbreytni að rígur myndi skapast milli tveggja liðsfélaga sem berjast á toppnum í Formúlu 1. Bæði Fernando Alonso og Nico Rosberg gáfust upp á því að finnast þeir varaskeifur fyrir Lewis Hamilton og þá má taka dæmi af Þjóðverjanum Sebastian Vettel og Mark Webber í liði Red Bull.

Vettel vann fjóra heimsmeistaratitla í röð með Red Bull árin 2010 til 2013 en Webber fannst hann aldrei fá sömu tækifæri til að sanna sig innan liðsins, líkt og sá þýski fékk.




Fleiri fréttir

Sjá meira


×