Veiði

Vænar bleikjur að veiðast í Elliðavatni

Karl Lúðvíksson skrifar
Vænar bleikjur úr Elliðavatni sem Daníel Karl veiddi nýlega
Vænar bleikjur úr Elliðavatni sem Daníel Karl veiddi nýlega Daníel Karl Egilsson

Það hefur verið tilfinning veiðimanna að bleikjan í Elliðavatni sé á miklu undanhaldi en miðað við frásagnir veiðimanna þetta vorið er einhver viðsnúningar í gangi.

Það hefur að vísu alltaf verið þannig við vatnið að fram í miðjan maí, kannski til enda maí, veiðist oftar en ekki mest urriði en þegar vatnið hlýnar aðeins hefur veiði á bleikju aukist. Undanfarin ár hefur verið mun minna af bleikju að veiðast en reynsluboltar við vatnið eiga að venjast en núna það sem af er sumri er sagan önnur og betri.

Það hafa verið að veiðast töluvert margar bleikjur og sumir af vanari veiðimönnum við vatnið segja að þeir hafi ekki séð jafn mikið af bleikju undanfarin ár og það sem meira er, sjaldan séð jafn margar vænar og nú. Það var alltaf þannig að 1-2 punda bleikja, og oft minni, var uppistaðann í veiðinni en núna eru 2-3 punda bleikjur bara mjög algengar.

Bleikjan virðist koma sérstaklega vel undan snjóþungum vetri og veiðist vel þegar vatnsstaða er góð eins og núna. Framundan er júní, klárlega besti mánuðurinn til að veiða við Elliðavatn og þegar dagarnir eru bjartir er gott að vera kominn við bakkann klukkan 7, ekki bara því þá veiðist best heldur til að fá pláss við bakkann. Þú mátt alveg búast við mörgum í veiðihug við þetta fallega vatn næstu daga.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.