Viðskipti erlent

Ætla að láta Musk standa við gerðan samning

Kjartan Kjartansson skrifar
Vörumerki Twitter í kauphöllinni í New York.
Vörumerki Twitter í kauphöllinni í New York. Vísir/EPA

Stjórn samfélagsmiðilsins Twitter segist ætla að láta Elon Musk standa við gerðan samning um kaup hans á miðlinum fyrir 44 milljarða dollara. Musk reynir nú að nota hlutfall gervireikninga á Twitter til að gera breytingar á samningnum eða komast undan honum.

Í yfirlýsingu sem stjórn Twitter sendi Bloomberg-fréttastofunni í dag segir að hún hyggist ljúka viðskiptunum og framfylgja samrunasamningnum við Musk, eiganda rafbílaframleiðandans Tesla og geimferðafyrirtækisins SpaceX.

Musk hefur undanfarna daga sagt að ekki sé hægt að ljúka viðskiptunum fyrr en botn fæst í hversu hátt hlutfall reikninga á Twitter eru yrki sem birta amapósta. Hann heldur því fram að hlutfallið sé allt að fjórfalt hærra en þau innan við 5% sem Twitter hefur sagt í tilkynningum til bandarískra yfirvalda í gegnum tíðina.

Nánast frá upphafi hafa verið vangaveltur um að Musk ætlaði sér ekki að standa við kaupin og hefur yfirlýsingar hans upp á síðkasti gefið þeim byr undir báða vængi. Bloomberg segir þó að í samningnum sé ákvæði um að ef annar aðilinn hætti við þurfi hann að greiða einn milljarð dollara.

Musk nægði þó ekki að greiða milljarðinn til að verða laus allra mála. Samkvæmt samningnum gæti stjórn Twitter stefnt honum til að standa við hann frekar en að greiða bætur fyrir vanefndir.


Tengdar fréttir

Musk skapar enn meiri vafa um kaupin á Twitter

Kaup auðkýfingsins Elons Musk á samfélagsmiðlinum Twitter eru nú í lausu lofti eftir að hann byrjaði að efast um tölur stjórnenda Twitter um hversu hátt hlutfall reikninga eru gervireikningar eða yrki (e. bot). Hann vill greiða minna en tilboðið sem hann lagði fram í síðasta mánuði.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.