Sjálfstæðisflokkurinn tapar þremur fulltrúum

Könnun Maskínu var gerð frá 8. apríl til 2. maí. Samfylkingin mælist stærst með 23 prósenta fylgi en dalar aðeins á milli kannana. Sjálfstæðisflokkurinn er næst stærstur með rúm tuttugu prósent en tapar þó mestu fylgi - eða fimm prósentustigum á milli kannana.

Píratar bæta vel við sig og standa í rúmum fjórtan prósentum. Fylgi Framsóknar dalar aðeins á milli kannana og er í tólf prósent,  sem þó er margfalt meira en í síðustu kosningum. Viðreisn hækkar úr tæpum sex prósentum upp í níu prósent og Vinstri græn fara úr 4,4 prósentum í tæp sjö prósent.

Fylgi Sósíalista lækkar lítillega á milli kannana, úr rúmum átta prósentum í sjö prósent. Flokkur fólksins er á svipuðu róli í könnunum og mælist með fjögur prósent en Miðflokkurinn fer úr tæpu prósentu í rúm tvö prósent.

Samfylkingin tapar samkvæmt þessu einum borgarfulltrúa og er með sex inni. Sjálfstæðisflokkurinn tapar mestu og færi úr átta fulltrúum í fimm. 

Framsókn mælist með þrjá nýja fulltrúa inni og Píratar bæta við sig tveimur og mælast með fjóra borgarfulltrúa. Þá heldur Viðreisn sínum tveimur fulltrúum og Vinstri Græn, Sósíalistar og Flokkur fólksins mælast með einn fulltrúa.

Miðflokkur tapar hins vegar sínum eina fulltrúa samkvæmt könnuninni.