Viðskipti erlent

Dómari segir Musk hafa logið um að taka Tesla af markaði

Samúel Karl Ólason skrifar
Elon Musk við opnun nýrrar verksmiðju í Þýskalandi í mars.
Elon Musk við opnun nýrrar verksmiðju í Þýskalandi í mars. EPA/CHRISTIAN MARQUARDT

Dómari hefur komist að þeirri niðurstöðu að Elon Musk, auðugasti maður heims, laug þegar hann hélt því fram í tístum árið 2018 að hann hefði tryggt sér fjármögnun til að taka bílafyrirtækið Tesla af markaði. Hann sagðist ætla að kaupa öll hlutabréf félagsins á 420 dali á hlut.

420 dalir á hlut var um tuttugu prósentum hærra en virði hlutabréfanna var á þessum tíma. Hann átti að hafa tryggt sér fjármögnun frá Sádi-Arabíu en aldrei varð af neinu slíku samkomulagi.

Hluthafar höfðuðu mál gegn auðjöfrinum vegna tístanna en dómari hefur nú komist að þeirri niðurstöðu að Musk hafi logið.

Sjá einnig: Musk íhugar að taka Tesla af markaði

Réttarhöld eiga að fara fram í næsta mánuði en í nýjum dómsskjölum sem opinberuð voru á föstudagskvöld segir dómarinn í málinu að Musk hafi sýnt mikið gáleysi og hann hafi vitað að tístin væru röng.

Musk hefur lýst yfir vilja til að kaupa samfélagsmiðlafyrirtækið Twitter í heild sinni.

Eftir tíst Musks árið 2018 voru viðskipti með hlutabréf Tesla stöðvuð en svo varð mikið flökt á verðmæti þeirra næstu vikurnar.

Reuters hefur eftir Alex Spiro, lögmanni Musks og Tesla, að það hafi verið satt að Musk hafi verið að íhuga að taka Tesla af markaði. Nú væru einhverjir lögmenn að reyna að hagnast með því að höfða mál og aðrir væru að reyna að koma í veg fyrir að sannleikurinn kæmi í ljós og grafa undan málfrelsinu.

Fjármálaeftirliti Bandaríkjanna sektaði Musk fyrir tístin og samþykkti hann að lögmaður þyrfti að samþykkja birtingu einhverra tísta hans. Samkvæmt frétt CNBC er Musk nú að reyna að fá þetta samkomulag fellt niður.

420 er einnig notað sem kóði fyrir kannabisneyslu í Bandaríkjunum.

Sjá einnig: Elon Musk reykti kannabis í beinni útsendingu og fjárfestar ókyrrast

Musk sagði á ráðstefnu fyrr í vikunni að hann hefði verið þvingaður til að samþykkja skilmála Fjármálaeftirlitsins á sínum tíma. Hann sagði forsvarsmenn stofnunarinnar hafa vitað af því að hann hefði í raun tryggt sér fjármögnun en bankar hefðu hótað því að gera Tesla gjaldþrota með því að loka á fjármögnun til fyrirtækisins ef hann yrði ekki við kröfum eftirlitsins.

Á ráðstefnunni kallaði hann forsvarsmenn Fjármálaeftirlitsins drullusokka.

Í frétt CNBC er sérstaklega bent á að það fari ekki saman að Musk segist hafa tryggt fjármögnun á sama tíma og hann segir að Tesla hefði getað verið gert gjaldþrota með því að bankar lokuðu á fjármögnun til fyrirtækisins.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.