Þetta gerðist á „sterkasta uppgjafarglímumóti landsins“ um helgina

Mótið var vel sótt en sex klúbbar sendu keppendur á mótið í ár. Anna Soffía Víkingsdóttir frá Atlantic AK varði titlana sína síðan í fyrra en hún sigraði bæði +70 kg flokk kvenna og opinn flokk kvenna líkt og í fyrra. Anna Soffía vann allar fjórar glímur sínar á uppgjafartaki. Anna Soffía hefur nú unnið Mjölnir Open oftar en nokkur önnur íþróttakona.

Kristján Helgi Hafliðason úr Mjölni vann +99 kg flokk karla þrátt fyrir að vigta sig inn aðeins 94 kg. Hann tók síðan opinn flokk karla eftir sigur á liðsfélaga sínum úr Mjölni, Halldóri Loga Valssyni. Af sex glímum Kristjáns kláraði hann fimm af þeim með uppgjafartaki en tókst ekki að klára Mikael Leó Aclipen úr Mjölni í opna flokkinum. Kristján fór í gegnum allar glímurnar án þess að fá eitt stig skorað á sig.

Valentin Fels vann -77 kg flokk karla sem var fjölmennasti flokkur mótsins. Valentin vann allar fjórar glímurnar sínar á uppgjafartaki og er þetta í þriðja sinn í röð sem hann tekur gull á Mjölnir Open.

Ómar Yamak vann -88 kg flokk karla (sá næst fjölmennasti á mótinu) og vann líka allar glímurnar sínar á uppgjafartaki. Það tók Ómar rúmar 6 mínútur samanlagt að vinna glímurnar fjórar og fékk hann ekkert stig skorað á sig. Þetta var í fjórða sinn sem Ómar vinnur gull á Mjölnir Open en í fyrsta sinn sem hann vinnur -88 kg flokkinn.

Halldór Logi Valsson vann -99 kg flokk karla og vann báðar glímurnar sínar í flokknum á uppgjafartaki. Hann fór síðan alla leið í úrslit í opnum flokki en tapaði fyrir Kristjáni eins og fyrr segir.

Viktor Gunnarsson vann -66 kg flokk karla eftir þrjá sigra. Þetta er í fyrsta sinn sem Viktor nær gulli á Mjölnir Open en hafði áður unnið til gullverðlauna á Mjölnir Open ungmenna.

Ingibjörg Birna Ársælsdóttir vann -70 kg flokk kvenna sem var fjölmennasti kvennaflokkur mótsins. Inga Birna tók síðan silfur í opnum flokki og átti góðan dag.

Lili Racz vann -60 kg flokk kvenna og vann báðar glímurnar sínar á uppgjafartaki. Lili hefur verið dugleg að keppa erlendis á undanförnum mánuðum og var þetta góður undirbúningur fyrir hennar næstu keppni á Grapplefest í maí.

Svipmyndir frá þessu glæsilega móti má sjá í spilaranum hér fyrir neðan.