Innherji

Enn „töluverður kraftur“ í kortaveltu heimila

Þorsteinn Friðrik Halldórsson skrifar
Kortaveltutölurnar varpa ljósi á breytt neyslumynstur. 
Kortaveltutölurnar varpa ljósi á breytt neyslumynstur.  VÍSIR/VILHELM

Heildarvelta innlendra greiðslukorta nam 82,3 milljörðum króna og jókst um 13 prósent frá sama mánuði í fyrra, sem er álíka vöxtur og var í janúar. Ef litið er aftur til febrúar 2020 nemur aukningin 4,5 prósentum. Þetta má lesa úr nýbirtum kortaveltugögnum Seðlabanka Íslands.

„Stóra myndin er sú að það er enn töluverður kraftur í kortaveltu heimila,“ segir Konráð S. Guðjónsson, aðalhagfræðingur sjóðastýringarfélagsins Stefnis.

Tölurnar varpa einnig ljósi á breytt neyslumynstur. Velta innlendra greiðslukorta í verslunum innanlands, sem nam alls 65,6 milljörðum króna, dróst þannig saman um 2,2 milljarða milli ára en velta innlendra greiðslukorta í verslunum erlendis nærri tvöfaldaðist úr 6,9 milljörðum í 14,7 milljarða.

„Við erum að horfa á sterka einkaneyslu í upphafi árs en hún er nánast öll innflutt svo bein hagvaxtaráhrif af því eru aðeins tvísýnni,“ segir Konráð.

Þá nam heildarvelta erlendra greiðslukorta á Íslandi 10,5 milljörðum króna í febrúar og jókst um 9,1 milljarð milli ára. Á föstu gengi var veltan í febrúar aðeins 28 prósentum minni en í febrúar 2020.

„Heilt yfir má segja að endurkoma ferðamanna sé að vega vel upp á móti aukinni verslun og ferðalögum Íslendinga erlendis,“ segir Konráð. „Heildarkortavelta í verslun innanlands jókst um 17 prósent milli ár og það er sannarlega til þess fallið að styðja við kraftmikinn hagvöxt í ársbyrjun.“



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.