Ellefu MR-ingar röðuðu sér í sautján efstu sætin

Kolbeinn Tumi Daðason skrifar 7. mars 2022 11:05

Keppendur í húsakynnum HR um helgina þegar gögnin voru afhent. Aðsend

Ellefu nemendur við Menntaskólann í Reykjavík höfnuðu í efstu sautján sætunum í Stærðfræðikeppni framhaldsskólanema sem fram fór um helgina. Þrjátíu keppendur mættu til leiks og fór svo að Benedikt Vilji Magnússon úr MR sigraði með 52 stigum af 60 mögulegum.

Í 2. sæti var Sverrir Hákonarson, nemandi við Verzlunarskóla Íslands, með 49 stig, í 3. sæti með 40 stig var Selma Rebekka Kattoll úr Menntaskólanum í Reykjavík og í 4. sæti með 39 stig var Ragna María Sverrisdóttir úr Verzlunarskóla Íslands.

Nemendur í 17 efstu sætunum munu taka þátt í Norrænu stærðfræðikeppninni fyrir Íslands hönd þann 4. apríl næstkomandi. Til að taka þátt í Ólympíukeppninni í stærðfræði þurfa nemendur að standa sig vel í forkeppni og vera yngri en 20 ára þegar keppnin fer fram í júlí.

Þremur nemendum hefur nú þegar verið boðið að taka sæti í sex manna liði Íslands fyrir Ólympíukeppnina í Osló í Noregi í ár en það eru þau Benedikt Vilji, Sverrir og Ragna María. Selma Rebekka verður því miður nýorðin tvítug þegar keppnin fer fram. Ragna María er á fyrsta ári í Verzlunarskólanum og verður spennandi að fylgjast með henni í framtíðinni. Hvaða þrír nemendur til viðbótar bætast í sex manna lið Íslands mun ráðast að lokinni Norrænu keppninni.

Það getur verið gott að gæða sér á skúffuköku og mjólk á milli þess sem hann reiknar stærðfræði.Aðsend

Úrslit voru tilkynnt í verðlaunahófi í Háskólanum í Reykjavík sunnudaginn 6. mars. Farið var yfir stærðfræðikeppnisárið og viðurkenningar afhentar, en efstu keppendur hlutu auk þess peningaverðlaun; 50 þúsund fyrir 1. sæti, 30 þúsund fyrir 2. sæti og 20 þúsund fyrir 3. sæti.

Keppnin er undirbúin í sjálfboðaliðastarfi nefndar á vegum Stærðfræðafélags Íslands og Félags raungreinakennara og fyrir úrslitakeppnina lagði Háskólinn í Reykjavík til húsnæði og kaffiveitingar. Alls 215 nemendur víðs vegar af landinu úr 16 framhaldsskólum tóku þátt í forkeppninni í ár, en þeim rétt rúmlega fjörutíu sem bestum árangri náðu þá var boðið til leiks í úrslitum. Hafa þeir nemendur fengið send æfingardæmi í vetur, til undirbúnings fyrir úrslitarimmuna.

Lokakeppnin samanstóð af sex verkefnum sem nemendur fengu fjóra tíma til að glíma við. Bestum árangri náðu þau í dæmi 3 en það var á þessa leið: Hver er mesti fjöldi búta sem fæst þegar hringskífu er skipt með 6 beinum línum? Vitanlega þurfti rökstuðningur að fylgja svarinu.

Í efstu 17 sætunum voru eftirfarandi nemendur sem taka munu þátt í Norrænu stærðfræðikeppninni þann fyrsta apríl:

1. Benedikt Vilji Magnússon - Menntaskólanum í Reykjavík

2. Sverrir Hákonarson - Verzlunarskóli Íslands

3. Selma Rebekka Kattoll - Menntaskólanum í Reykjavík

4. Ragna María Sverrisdóttir - Verzlunarskóli Íslands

5. Kirill Zolotuskiy - Menntaskólanum í Reykjavík

6. Kristján Dagur Jónsson - Menntaskólanum í Reykjavík

7. Hrafnkell Hvanndal Halldórsson - Menntaskólanum í Reykjavík

8.-9. Gústav Nilsson - Verzlunarskóla Íslands

8.-9. Arnar Dór Vignisson - Menntaskólanum í Reykjavík

10. Viktor Már Guðmundsson - Menntaskólanum í Reykjavík

11. Einar Andri Víðisson - Menntaskólanum í Reykjavík

12.-14. Ísak Norðfjörð - Menntaskólanum í Reykjavík

12.-14. Freyr Víkingur Einarsson - Menntaskólanum við Hamrahlíð

12.-14. Ingi Hrannar-Pálmason - Menntaskólanum á Akureyri

15.-16. Veigar Elí Grétarsson - Verzlunarskóla Íslands

15.-16. Matthías Andri Hrafnkelsson - Menntaskólanum í Reykjavík

17. Matthildur Peta Jónsdóttir - Menntaskólanum í Reykjavík

Skóla - og menntamál Framhaldsskólar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir