Martin er að spila með spænska stórliðinu Valencia sem hefur ekki hleypt honum í verkefni landsliðsins undanfarin ár. Martin var aftur á móti með íslenska liðinu í Hollandi og sýndi þá styrk sinn með því að skora 27 stig í dýrmætum útisigri á Hollendingum í undankeppni HM.
Guðjón Guðmundsson hitti Martin á æfingu íslenska liðsins í Ólafssalnum þar sem leikurinn verður annað kvöld.
„Þetta lið sem við erum búnir að tala um í nokkur ár að vilja setja saman erum allir komnir hingað fyrir utan Kristófer sem vantar,“ sagði Martin Hermannsson.
„Við vitum að þetta verður erfitt en á sama tíma erum við að fókussa á okkur sjálfa núna. Við teljum okkur vera með lið sem getur alla vega staðið í öllum. Við erum að fara inn í þessa leiki til þess að vinna þá,“ sagði Martin sem hefur verið að spila vel á Spáni.
Martin er með 10,1 stig og 3,4 stoðsendingar að meðaltali í leik í sterkustu deild í Evrópu, ACB-deildinni á Spáni.
„Mér líður bara vel og er í stóru hlutverki í mjög góðu liði. Okkur fjölskyldunni líður alveg hrikalega vel,“ sagði Martin en hvað þarf íslenska liðið að gera til að standa í liði eins og Ítalíu?
„Það þarf svolítið allt að falla með okkur. Við þurfum að hitta á góðan skotdag, það myndi hjálpa að hitta skotum. Svo þarf varnarleikurinn okkar að vera upp á tíu á móti stórum, sterkum, fljótum og góðum skotmönnum sem þeir hafa. Það þarf allt að smella ef við ætlum að vinna,“ sagði Martin.
Martin lék síðast með íslenska landsliðinu á Íslandi 17. ágúst 2019 þegar íslensku strákarnir unnu Portúgal í Laugardalshöllinni. Martin var með 19 stig og 7 stoðsendingar í leiknum.
