Tveir stærstu hluthafar indó eru stofnendur sparisjóðsins, þeir Tryggvi Björn Davíðsson og Haukur Skúlason. Tryggvi Björn á 18,7 prósenta hlut en Haukur rúm 17 prósent.
Aðeins einn annar hluthafi á meira en tíu prósenta hlut en það fjárfestingafélagið Eldhrímnir sem fer með 14,5 prósent. Eldhrímnir, sem er í eigu Ingimundar Sveinssonar arkitekts og fjölskyldu, hagnaðist gríðarlega á fjárfestingu sinni í skyrgerðinni Siggi‘s og var með eigið fé upp á 4,3 milljarða króna í lok árs 2020.
Haraldur Þorleifsson, stofnandi hönnunarstofunnar Ueno, er fjórði stærsti hluthafinn með tæplega 6 prósenta hlut. Eins og kunnugt er seldi Haraldur fyrirtæki sitt til samfélagsmiðilsins Twitter í byrjun árs 2021 fyrir háar fjárhæðir.
Seðlabanki Íslands veitti indó leyfi til að starfa sem sparisjóður í gær. Sparisjóðurinn tryggði sér tæplega 600 milljóna króna fjármögnun síðastliðið haust og var það hluti af lokaskrefunum til að fá tryggja samþykki á starfsleyfisumsókn. Á næstu mánuðum mun félagið ganga frá samþættingu tölvukerfa sinna við kerfisinnviði Seðlabankans.
Finna má fleiri kunnugleg nöfn í efstu tíu sætum hluthafalistans, svo sem Iceland venture studios, sem er stýrt af Bala Kamallakharan, eignarhaldsfélagið Adira ehf., sem er aðaleigandi Nespresso á Íslandi og er í eigu Jónasar Hagan Guðmundssonar, og loks Omega ehf., sem er í eigu Birgis Más Ragnarssonar og Andra Sveinssonar en þeir hafa um langt skeið verið viðskiptafélagar Björgólfs Thors Björgólfssonar.
Í viðtölum við stofnendur indó hefur komið fram að áform félagsins miði að því að að bjóða upp á veltureikninga tengda við debetkort og verður þjónustan alfarið í snjallsímaforriti. Ólíkt hefðbundinni bankastarfsemi verða innstæður viðskiptavina indó ekki lánaðar út, nema til ríkisins. Þannig verða öll innlán hjá indó lögð inn á reikning hjá Seðlabankanum eða þeim fjárfest í ríkisskuldabréfum.
