Morten Messerschmidt sat lengi á Evrópuþinginu en var kjörinn á danska þingið árið 2019.EPA
Danski þingmaðurinn Morten Messerschmidt var í gær kjörinn formaður Danska þjóðarflokksins (d. Dansk Folkeparti). Hann tekur við stöðunni af Kristian Thulesen Dahl sem hætti í kjölfar bágrar niðurstöðu flokksins í sveitarstjórnarkosningunum í nóvember.
Kjör Messerschmidts kom ekki á óvart en hann hlaut í fyrstu umferð formannskjörsins um sextíu prósent atkvæði þeirra 825 flokksþingsfulltrúa sem höfðu atkvæðisrétt. Ekki þurfti því fleiri umferðir og var hann lýstur nýr formaður.
Messerschmidt segist ætla að leggja áherslu á að skapa einingu innan flokksins, en flokkurinn hefur að undanförnu ítrekað ratað í fréttir vegna sundrungar og þá hafa einstaka kjörnir fulltrúar flokksins verið harðlega gagnrýndir vegna framgöngu sinnar.
Messerschmidt hlaut 499 atkvæði í atkvæðagreiðslunni, Martin Henriksen 219 atkvæði og Merete Dea Larsen 104.
Hinn 41 árs Messerschmidt var Evrópuþingmaður fyrir Danska þjóðarflokkinn, sem hefur lengi barist fyrir harðari innflytjendalöggjöf, á árunum 2009 til 2019 en var svo kjörinn á danska þingið árið 2019. Hann sat einnig á danska þinginu á árunum 2005 til 2009.
Danski þjóðarflokkurinn beið afhroð í sveitarstjórnarkosningunum sem fram fóru í gær og hefur formaður flokksins, Kristian Thulesen Dahl, lagt til að boðað verði til aukalandsþings og nýr formaður kjörinn.
Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.
