Viðskipti innlent

Hafnar því alfarið að N1 sé að blekkja neytendur

Fanndís Birna Logadóttir skrifar
Hinrik Örn Bjarnason, framkvæmdastjóri N1.
Hinrik Örn Bjarnason, framkvæmdastjóri N1.

Framkvæmdastjóri N1 hafnar því alfarið að viðskiptavinir séu beittir blekkingum í tengslum við þrautavaraleið á sölu raforku. Hann fagnar því að umræða eigi sér nú stað á raforkumarkaði og að fyrirkomulag þrautavaraleiðarinnar sé nú til skoðunar.

Frá því um mitt ár 2020 hefur Orkumálastofnun tekið ákvörðun á hálfs árs fresti um val á rafsölufyrirtæki til þrautavara, ef fólk velur sér ekki fyrirtæki sjálft, og er það fyrirtækið sem býður upp á lægsta verðið. N1 rafmagn hefur frá upphafi verið fyrir valinu og þannig fengið til sín mánaðarlega um þúsund nýja viðskiptavini.

Samkeppnisaðilar hafa þó gagnrýnt að þeir viðskiptavinir séu látnir borga hærra verð fyrir rafmagn hjá N1 heldur en þeir viðskiptavinir sem skrá sig sjálfir, verð sem er allt að 75 prósent hærra. Framkvæmdastjórar Orku náttúrunnar og Straumlindar, tvö af átta fyrirtækjum sem selja raforku til almennra notenda, hafa til að mynda sakað N1 um blekkingar.

Hinrik Örn Bjarnason, framkvæmdastjóri N1, hafnar því alfarið að um blekkingar sé að ræða. Hann segir einfaldlega ekki raunhæft að bjóða öllum sama verð þar sem þau þurfa að kaupa dýrari orku á skammtímamarkaði fyrir þrautavaraviðskiptavini. Erfitt er að gera ráð fyrir þeim fjölda sem kemur inn í gegnum þrautavaraleiðina.

„Við erum að reyna að verðlauna viðskiptavini sem að koma til okkar í viðskipti, kjósa að gera það, á bestu kjörunum. Hins vegar eru þeir sem eru að koma inn til okkar þessa þrautavaraleið mun dýrari í innkaupum fyrir okkur þannig að við erum að kaupa inn raforku frá birgjunum okkar á allt öðrum kjörum fyrir þá viðskiptavini,“ segir Hinrik.

Hann bendir þó á að allir sem koma inn í gegnum þrautavaraleiðina geti haft samband við N1 og fengið ódýrara verðið með því að skrá sig. Þrautavaraviðskiptavinir eru nú rukkaðir um yfir tíu krónur á kílóvattstund en ódýrasta verðið er 6,44 krónur.

„Þá ferðu strax á okkar besta taxta, 6,44 krónur, sem er tugum prósentum lægra en frá mörgum samkeppnisaðilum þannig að það er greinilega hagkvæmt fyrir fólk að skoða þetta,“ segir Hinrik. Hann segist fagna allri samkeppni og hvetur neytendur til að vera vakandi.

„Það er öllum sjálfsagt að bjóða lægra verð en við, við stýrum ekki söluverði á raforku á Íslandi og ég satt að segja veit ekki hvort við gætum afsalað okkur þessari þrautavaraleið og sé svo sem ekki heldur af hverju við ættum að gera það,“ segir Hinrik.

Hægt að fara ýmsar aðrar leiðir

Orkumálastjóri greindi frá því í kvöldfréttum Stöðvar 2 í gær að verið væri að endurskoða fyrirkomulag þrautavaraleiðarinnar vegna þeirra stöðu sem nú er uppi.

„Þetta fyrirkomulag er ekki fullkomið og er í mótun og við höfum aldrei hafnað því að skoða þarna breytingar, enda er það í skoðun að breyta því og allir geta komið með sínar tillögur,“ segir Hinrik.

„Við sjáum hins vegar að það er mikil breyting á raforkumarkaðinum, innkaupaverð okkar hafa hækkað mikið og það er væntanlega eitthvað sem Orkustofnun sá ekki fyrir sér þegar í upphafi þegar þessi rammi var búin til,“ segir hann enn fremur.

Hann segir að ýmsar aðrar leiðir séu færar, til að láta viðskiptavini sem ekki velja sér raforkusala sjálfir greiða álag, eða einfaldlega að skylda fólk til að velja.

„Það eru margar leiðir færar en það er rosalega erfitt að binda einhvern í að selja á sama verði til næstu sex mánuða og þú gerðir síðustu sex mánuði þegar innkaupsverðin þín hafa gjörbreyst,“ segir Hinrik.


Tengdar fréttir

Okrað með aðstoð ríkisins

Hugsum okkur ungt par sem er að byrja að búa. Það flytur inn fullt tilhlökkunar að takast á við þau verkefni sem fylgja sjálfstæðu lífi.

„Ef þú gerir ekki neitt þá ferðu á hæsta raf­magns­verð Ís­lands­sögunnar“

Framkvæmdastjóri Orku náttúrunnar gagnrýnir harðlega að ekki sé virkt eftirlit með sölu á raforku í landinu og segir að svindlað sé á neytendum með núverandi fyrirkomulagi. Hún segir óvanalegt að ríkið geti ákveðið til lengri tíma við hvaða fyrirtæki fólk eigi í viðskiptum við og kallar eftir aukinni umræðu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.