Dusty opnaði sláturhús í kjarnorkuverinu

Snorri Rafn Hallsson skrifar
dusty-xy

Á meðan Dusty hefur hefur verið á óslitinni sigurgöngu allt frá upphafi tímabilsins hefur gengi XY verið nokkuð upp og ofan. Engu að síður er liðið í fjórða sæti deildarinnar fast á hælana á Vallea sem situr í því þriðja. Síðast þegar liðin mættust vann Dusty 16-9 en það var einnig í Nuke kortinu. Kortið er nokkuð opið og býður upp á möguleikann á að skapa tækifæri með vappanum og því má segja að þetta hafi verið fyrsta prófraun XY án Minidegreez, en J0n er aftur tekinn við því hlutverki eftir að Minidegreez fór yfir til Vallea.

XY vann hnífalotuna og byrjaði í vörn (Counter-Terrorists). Sú byrjun var í verra lagi. Dusty reyndi sömu taktík og í síðasta leik sínum í Nuke gegn Fylki, nema í þetta sinn gekk hún upp. Dusty náði tökum á útisvæðinu og sérstaklega spennandi var að fylgjast með nýliðanum Cryths sem lék afar skipulega, framkvæmdi eina aðgerð í einu og lét ekkert fram hjá sér fara í opnunarhlutverkinu. Hann var þannig hraður, hreyfanlegur og hittinn allt í senn. Dusty voru agaðir enn sem fyrr en ólíkt því sem sést hefur í fyrri leikjum liðsins þurfti Dusty engan tíma til að koma sér í gang. Strax frá upphafi voru allar atlögur þéttar og skipulagðar og bar á meiri alvöru í leik Dusty en oft áður. XY náðu ekki að opna neinar dyr fyrr en undir lok síðari hálfleiks þegar liðinu tókst að krækja sér í tvær lotur í röð og bæta svo öðrum tveimur við örlitlu síðar. Útlitið var þó svart.

Staða í hálfleik: Dusty 11 - 4 XY

Í upphafi síðari hálfleiks náði Bjarni þremur fellum með skambyssu í hvorri hönd og setti það tóninn fyrir síðari hálfleik. Dusty gjörsamlega yfirspiluðu XY og voru númerinu stærri allan tímann. Loturnar féllu hver á fætur annarri Dusty í vil og leiknum lauk því skjótt.

Lokastaða: Dusty 16 - 4 XY

Dusty sýndu í þessum leik að ekki bara er liðið í öðrum klassa en önnur lið deildarinnar heldur hafa þeir nú það sem þarf til að stoppa upp í þeirra eina galla, að vera stundum lengi í gang. Liðið situr þvís em fastast á toppnum en mætir Þór í toppslagnum næsta föstudag. XY heldur fjórða sætinu en mætir gamla félaga sínum Minidegreez með Vallea næsta þriðjudag. Þá þarf XY að taka á honum stóra sínum til að missa Vallea ekki of langt frá sér í deildinni. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.