Innlent

Örmagna göngumanni bjargað við Keili

Kolbeinn Tumi Daðason skrifar
Gengið með göngumanninn á börum. Keilir í baksýn.
Gengið með göngumanninn á börum. Keilir í baksýn. Landsbjörg

Björgunarsveitarfólk kom göngumanni til bjargar norðvestur af Keili eftir hádegið í dag eftir neyðarkall hans vegna þreytu. Viðkomandi hringdi í Neyðarlínuna klukkan 13 og var hann kominn upp í björgunarsveitarbíl þremur og hálfri klukkustund síðar.

Í tilkynningu frá Landsbjörg kemur fram að göngumaðurinn hafi verið örmagna norðvestur af Keili þegar hann óskaði eftir aðstoð klukkan 13. Var hann í hrauninu við Höskuldarvelli og hafði verið á göngu við annan mann frá því fyrr í dag þegar hann varð örmagna af þreytu, en að öðru leyti óslasaður. Björgunarsveitir voru kallaðar út stuttu síðar til leitar að honum.

„Svæðið í kringum gönguleiðina að Keili er mjög gróft apalhraun og erfitt yfirferðar,“ segir í tilkynningu Landsbjargar.

Við komuna að björgunarsveitarbílnum eftir að hafa gengið með manninn á börum tveggja kílómetra langa leið.Landsbjörg

Maðurinn hafi verið í lélegu símasambandi í grófu hrauninu og skilyrði til leitar því ekki með besta móti. Björgunarsveitarfólk hélt á svæðið úr tveimur áttum, hópar frá Grindavík, Vogum og Hafnarfirði. Rétt fyrir klukkan 15 voru mennirnir fundnir, þeim komið fyrir í neyðarskýli og þeim gefin orka og hlúð að þeim örmagna.

Maðurinn var óslasaður, orkulaus en að öðru leyti í ágætis ásigkomulagi. Búið var um hann í sjúkrabörum og hjóli komið undir þær, þar sem flytja þurfti hann tveggja kílómetra leið að björgunarsveitarbíl. Það var svo um klukkan 16:30 sem björgunarsveitarfólk kom með manninn að björgunarsveitarbílnum sem flytur þá félagana til byggða.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.