Viðskipti innlent

Allt að tólf milljóna veitingastyrkur í boði

Tryggvi Páll Tryggvason skrifar
Nýr veitingastyrkur verður kynntur til sögunnar.
Nýr veitingastyrkur verður kynntur til sögunnar. Vísir/Hanna

Eigendur ákveðinna veitingastaða geta átt rétt að allt að tólf milljóna veitingastyrk til að mæta áhrifum sem samkomutakmarkanir hafa haft á rekstur þeirra.

Þetta er á meðal þeirra efnahagslegu aðgerða sem ríkisstjórnin hyggst ráðast í, eftir að tilkynnt var í dag að samkomutakmarkanir yrðu hertar til 2. febrúar næstkomandi. Skemmtistöðum, krám, spilasölum og spilakössum verður lokað en áfram mega 20 manns að hámarki vera saman í rými á veitingastöðum, sem mega hafa opið til 21.

Stefnt er að því að Bjarni Benediktsson fjármálaráðherra, muni leggja fram frumvarp þar sem þeir, sem reka veitingastaði með veitingaleyfi II og III og orðið hafa fyrir minnst tuttugu prósent tekjufalli í desember 2021 til mars á þessu ári vegna takmarkana á opnunartíma, geti sótt um styrk sem geti numið allt að tólf milljónum króna fyrir tímabilið.

Styrkfjárhæðin ræðst annars vegar af fjölda stöðugilda og hins vegar af tekjufalli hvers fyrirtækisins.

Þá mun ríkisstjórnin einnig leggja fram frumvarp sem heimilar ákveðnum veitingastöðum, sem hafa orðið að sæta takmörkunum á opnunartíma, að fresta staðgreiðslu skatta og greiðslu tryggingagjalds.

„Frá því samkomutakmarkanir voru hertar í nóvember er merkjanlegur samdráttur í greiðslukortaveltu hjá fyrirtækjum í veitingarekstri, ólíkt þróun í hagkerfinu í heild. Hertar takmarkanir hafa þannig haft mikil áhrif á starfsemi ákveðinna fyrirtækja í veitingarekstri og leitt til samdráttar í tekjum þeirra. Á þetta fyrst og fremst við um fyrirtæki með vínveitingaleyfi, s.s. veitingahús og bari,“ segir í tilkynningu á vef Stjórnarráðsins.

Eigendum veitingastaða með veitingaleyfi í flokki II og III verður þannig heimilað að fresta allt að tveimur greiðslum á afdreginni staðgreiðslu launa og tryggingagjalds sem eru á gjalddaga 1. janúar til og með 1. júní á árinu 2022.

Í frumvarpinu er einnig lagt til að umsóknarfrestur vegna viðspyrnustyrkja fyrir nóvembermánuð 2021 verði framlengdur til 1. mars 2022, en þeir styrkir ná til allra atvinnugreina að því gefnu að tekjufallsviðmið séu uppfyllt. Frestur til að sækja um viðspyrnustyrki rann út 31. desember 2021.


Tengdar fréttir

Lagði til að öllu yrði skellt í lás í tíu daga

Til greina kemur að beita víðtækum lokunum í samfélaginu sem ná til fyrirtækja, stofnana og skóla í takmarkaðan tíma til að ná fjölda kórónuveirutilfella hratt niður, að mati sóttvarnalæknis. Gætu slíkar lokanir til að mynda staðið í tíu daga og í kjölfarið verið aflétt í skrefum.

Segir veitingaaðilum létt með óbreyttum reglum og styrkjum

Reglur hvað varða veitingastaði hér á landi eru nokkurn veginn óbreyttar. Formaður Samtaka ferðaþjónustunnar segir þetta mikinn létti fyrir veitingahúsaeigendur og hótelrekendur sem hafi verið farnir að reikna með enn harðarði takmörkunum.

Tíu mega koma saman

Sóttvarnaraðgerðir verða hertar og taka þær gildi á miðnætti. Heilbrigðisráðherra segir að sóttvarnalæknir hafi lagt fram þrjár leiðir: Óbreyttar aðgerðir, færa samkomutakmarkanir úr tuttugu manns í tíu, eða lokun á samfélaginu í tíu daga. Ríkisstjórnin hafi valið leið tvö.

Meiri neysla við há­punkt far­aldursins en árið 2019

Kortavelta innlendra greiðslukorta jókst um 14% í desember miðað við sama mánuð árið 2020. Kortavelta Íslendinga erlendis nam tæplega 18 milljörðum króna og jókst um 90% milli ára miðaða við fast gengi.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×