Spike fór á kostum í sigri Vallea á Kórdrengjum

Snorri Rafn Hallsson skrifar
Vallea - kórdrengir

Stærstu tíðindin í leikmannaskiptum yfir hátíðirnar var sennilega brottför Minidegreez frá XY sem nú er genginn til liðs við Vallea. Má leiða líkur að því að með þessari skiptingu ætli Vallea sér að gera atlögu að öðru sæti deildarinnar sem þeir réttilega telja sitt. Minidegreez lék í stað leikstjórnandans Denos og tekur við vappahlutverkinu af Spike sem svo sannarlega lét ljós sitt skína á rifflinum í staðinn. Kórdrengir stilltu upp óbreyttu liði.

Fyrri leikur Vallea og Kórdrengja var æsispennandi viðureign í Mirage kortinu þar sem Vallea vann 19-15 í framlengingu. En aftur lá leiðin í Nuke sem öll lið virðast kunna ágætlega við og fór Vallea létt með að vinna hnífalotuna. Kórdrengir hófu því leikinn í sókn (Terrorists) og þrátt fyrir að sækja af miklum krafti í upphafi tókst Vallea að snúa lotunum sér í vil þó útlitið væri slæmt á köflum. Munaði þar mestu um að Spike var sjóðheitur á rifflinum og unir sér greinilega vel í því hlutverki. Innkoma Minidegreez hefur því gert það að verkum að Spike fær meira rými til að vera árasargjarn og skapandi í aðgerðum sínum og það skilaði sér svo sannarlega. Kórdrengjum tókst fyrst að vinna lotu í þeirri sjöundu og komust aldrei á gott ról í leiknum. Vallea léku af miklu öryggi og höfðu stórt forskot í lok fyrri hálfleiks.

Staða í hálfleik: Vallea 11 - 4 Kórdrengir

Vallea gekk frábærlega í síðari hálfleik að koma sprengjum fyrir en áttu hins vegar í miklum vandræðum með að verja þær fyrir Kórdrengjum. Aðgerðirnar kostuðu oftar en ekki marga leikmenn lífið og voru loturnar dýrar fyrir bæði lið. Kórdrengjum tókst að tengja saman nokkrar lotur í röð og tóku á móti Vallea mönnum af krafti en eftir slakan fyrri hálfleik dugðu taktar eins og fjórföld fella Demants ekki til að tryggja þeim sigurinn. Síðustu loturnar voru spennuþrungnar. Í stöðunni 14-10 reyndu Vallea að lauma sér inn á sprengjusvæði og komu sprengjunni niður undir skothríð þar sem bæði lið misstu tvo leikmenn. Hyperactive bætti um betur og kom Kórdrengjum í þrjá á móti einum en Stalz stóðst prófraunina og felldi samtals fjóra andstæðinga til að koma Vallea í sigurstöðu. Í tuttugustu og sjöttu lotu var því að duga eða drepast fyrir Kórdrengi sem ekki náðu að vopnast vel. Minidegreez og Narfi opnuðu lotuna hvor með sína fellu og eftirleikurinn reyndist auðveldur.

Lokastaða: Vallea 16 - 10 Kórdrengir

Leikmannabreytingar Vallea hafa greinilega skilað sínu og munar heldur betur um Minidegreez sem á auðvelt með að koma sér inn í leikstíl agaðs og skipulagðs liðs eins og Vallea, sem nú er jafnt Þór að stigum en Þór á þó leik til góða á föstudaginn. Næst lætur Minidegreez prikið vonandi telja gegn Fylki föstudaginn 22. janúar en sama kvöld taka Kórdrengir á móti Ármanni. Sýnt verður frá leikjunum á Stöð 2 Esport og á Twitch síðu Rafíþróttasamtaka Íslands.

Bein lýsing

Leikirnir




    Velkomin á Vísi. Þessi vefur notar vafrakökur. Sjá nánar.