Viðskipti erlent

Mikill áhugi verktaka á að bjóða í fyrstu skipagöngin

Kristján Már Unnarsson skrifar
Skipagöngin að innanverðu, eins og menn sjá fyrir sér að þau muni líta út fullbúin árið 2026.
Skipagöngin að innanverðu, eins og menn sjá fyrir sér að þau muni líta út fullbúin árið 2026. Kystverket/Snøhetta, Plomp

Mikill áhugi er meðal alþjóðlegra verktaka að grafa fyrstu skipagöng heims í Noregi. Stefnt er að því að gerð ganganna verði boðin út á fyrri hluta nýs árs.

Í fréttum Stöðvar 2 kom fram að undirbúningur skipaganganna hafi staðið yfir í hartnær áratug. Myndir voru sýndar af því þegar skipstjórar voru látnir prófa þau í sérstökum siglingahermi.

Skipstjórar æfa siglingu um göngin í siglingahermi.Kystverket

Göngin hafa einnig kostað áralangar pólitískar þrætur en gagnrýnendur hafa sagt þau fjárhagslegt glapræði. Endanlegt samþykki norska Stórþingins fyrir gerð ganganna fékkst þó síðastliðið vor en nýjustu áætlanir gera ráð fyrir að þau muni kosta í kringum fimmtíu milljarða íslenskra króna.

Skipagöngin verða 1,7 kílómetrar að lengd, 36 metrar á breidd og 50 metrar á hæð en þar af verður þriðjungurinn undir sjávarmáli. Megintilgangur þeirra er sagður sá að auka öryggi sjófarenda með því að sneiða framhjá einhverri hættulegustu siglingaleið heims, veðravítinu og röstinni úti fyrir Stað milli Álasunds og Bergen. Stuðningsmenn skipaganganna segja þau jafnframt verða mikið aðdráttarafl fyrir ferðamenn sem einstakt mannvirki á heimsvísu.

Við hönnun skipaganganna er gert ráð fyrir aðstöðu fyrir ferðamenn til að fylgjast með skipum sigla inn og úr göngunum.Stad skipstunnel

Áformað er að útboðið hefjist á fyrri hluta næsta árs og að samningar við verktaka verði undirritaðir öðru hvoru megin við þarnæstu áramót. Áætlað er að framkvæmdir hefjist sumarið 2023 og að göngin verði opnuð skipaumferð árið 2026.

Verkefnisstjóri ganganna segist upplifa mikinn áhuga alþjóðlegra verktaka. Í viðtali við norska fréttamiðilinn Teknisk Ukeblad bendir hann á að 170 aðilar hafi nýlega sótt rafræna undirbúningsráðstefnu á netinu sem norska hafnamálastofnunin Kystverket hélt fyrir áhugasama bjóðendur.

Gert er ráð fyrir að bílvegur liggi yfir gangamunnann.Stad skipstunnel

„Áhuginn er mikill úr öllum heimshornum. Það er eins og þetta sé verkefni sem stórir verktakar vilji hafa á ferilskrá sinni,“ segir verkefnisstjórinn Terje Skjeppestad.

Hann bendir að verkefnið kunni að vera of stórt til að norskir verktakar ráði einir við það. Um leið geti verið erfitt fyrir alþjóðleg fyrirtæki að treysta alfarið á innfluttan mannskap sem þekki lítt til staðhátta. Það megi því búast við að samstarfshópar myndist um tilboðsgerð.

Á þátttökulista ráðstefnunnar voru allir helstu verktakar Noregs í jarðgangagerð, eins og Veidekke, Hæhre, Implenia, Kruse Smith og Skanska. Meðal alþjóðlegra verktaka eru nefndir Marti og Basler & Hofmann frá Sviss, Acciona, Obrascón og Aldesa frá Spáni, Astaldi og Impresa frá Ítalíu, Boskalis frá Svíþjóð og China Railway International Group frá Kína.

Sem dæmi um stærð þessara fyrirtækja er nefnt að hið spænska Acciona er með 38 þúsund starfsmenn í 40 löndum.

Hér má sjá frétt Stöðvar 2:


Tengdar fréttir

Skipagöngum þvingað í gegnum Stórþingið

Framkvæmdir við fyrstu skipagöng heims hefjast við Stað í Noregi á næsta ári. Þetta varð ljóst eftir að Framfaraflokkurinn og stjórnandstaðan knúðu málið í gegnum Stórþingið þegar norska ríkisstjórnin hugðist setja skipagöngin í salt.

Tvísýnt um skipagöngin sem þykja dýr fyrir norska ríkið

Bakslag er komið í áform Norðmanna um að grafa fyrstu skipagöng heims. Pólitísk hrossakaup til að viðhalda lífi norsku ríkisstjórnarinnar veittu göngunum þó gálgafrest og komu í veg fyrir að þau yrðu slegin af.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.