Eldsmiðjan kveður eftir 35 ár

Eiður Þór Árnason skrifar 1. desember 2021 10:11

Eldsmiðjan sérhæfir sig í eldbökuðum pizzum. Vísir/vilhelm

Eldsmiðjunni við Suðurlandsbraut verður lokað næsta vor þegar hún víkur fyrir nýjum veitingastað. Um er að ræða seinasta útibú Eldsmiðjunnar sem var á fjórum stöðum snemma árs 2020. Fyrsta Eldsmiðjan var opnuð á Bragagötu árið 1986 en rekstri staðarins var hætt í fyrra.

Í stað Eldsmiðjunnar opnar veitingastaðurinn OLIFA - La Madre Pizza við Suðurlandsbraut en pizzastaðurinn verður rekinn af Ásu Maríu Reginsdóttur og Emil Hallfreðssyni í samstarfi við Gleðipinna. Fyrirtækið OLIFA stofnuðu hjónin ásamt Francesco Allegrini til að flytja inn matvörur beint frá Ítalíu.

Fram kemur í tilkynningu frá Gleðipinnum að samhliða opnuninni muni Eldsmiðjan kveðja landsmenn um „óákveðinn tíma.“ Auk Eldsmiðjunnar reka Gleðipinnar Blackbox Pizza, Shake&Pizza og fleiri veitingastaði. Veitingahúsakeðjan Foodco keypti Eldsmiðjuna árið 2007 en Foodco sameinaðist Gleðipinnum árið 2019.

„Okkur Gleðipinnum þykir afar vænt um Eldsmiðjuna og það má segja að hún sé að fara í ótímabundið frí. Vörumerkið er rótgróið og sterkt og við munum að sjálfsögðu varðveita það áfram”, segir Jóhannes Ásbjörnsson, talsmaður Gleðipinna.

Bjóða Íslendingum til borðs

Ása María segir að þau hjónin hafi ástríðu fyrir góðum og vönduðum hráefnum en þau hafa búið lengi á Ítalíu.

Ása María Reginsdóttir og Emil Hallfreðsson búa á Ítalíu ásamt börnum sínum.

„Hér höfum við fengið ljúft og gott mataruppeldi sem hefur mótað okkur mjög. OLIFA vörurnar hafa fengið frábærar viðtökur heima og það má segja að OLIFA - La Madre Pizza sé loks fyrsta skrefið í því að bjóða Íslendingum til borðs með okkur,” segir Ása María, framkvæmdastjóri OLIFA, í tilkynningu. Einnig verður hægt að finna OLIFA - La Madre Pizza í nýrri Krónuverslun í Skeifunni.

Miklar breytingar á veitingamarkaði

Jóhannes hjá Gleðipinnum segir að stjórnendur fyrirtækisins sé afar spennt fyrir því að taka þátt í þessu ævintýri Ásu og Emils.

„Þetta er þeirra draumur og og við erum montin af því að fá að vera samferða”, segir Jóhannes.

Jóhannes Ásbjörnsson, talsmaður Gleðipinna.VÍSIR/VILHELM

Hann bætir við að pizzamarkaðurinn hafi þróast mikið og breyst á liðnum árum og Eldsmiðjan í núverandi mynd falli ekki fullkomlega að framtíðarsýn Gleðipinna.

„Okkur finnst gaman að gera nýja og skemmtilega hluti og þess vegna fannst okkur tilvalið að nýta Eldsmiðjustaðinn á Suðurlandsbraut undir OLIFA La Madre Pizza. En þó að Eldsmiðjan sé farin í frí þá er aldrei að vita nema hún skjóti upp kollinum aftur síðar,” segir Jóhannes.

Fréttin hefur verið uppfærð.

Veitingastaðir Reykjavík Tímamót

Tengdar fréttir

Gáfust upp á biðinni eftir ferðamönnum

Veitingastaðnum Eldsmiðjunni á Bragagötu í Reykjavík hefur verið lokað fyrir fullt og allt. Lauk þar með sögu eins elsta pítsustaðar landsins. Á síðasta ári fækkaði stöðum Eldsmiðjunnar úr fjórum í einn.

20. janúar 2021 21:10

Emil pældi lítið í matnum en sýndi mér meiri áhuga

„Þar sem við sátum þarna saman á einu af fyrstu stefnumótunum okkar tók ég eftir að maturinn var algert aukaatriði hjá honum,“ segir Ása María Reginsdóttir í viðtali við Makamál.

27. nóvember 2021 12:00

Hlýt að vera heppnasta manneskja í heimi

Segir Ása Reginsdóttir, eiginkona Emils Hallfreðssonar, sem mætti kalla þriðja þjálfarann hans. "Ég er svo innilega með honum í þessu og samvinnan er að skila sér,“ segir Ása. Emil og Ása segja frá HM og lífi sínu á Ítalíu.

30. júní 2018 07:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.