Neytendur

Kalli Katrínar svarað með Svörtum fössara og Myrkum markaðs­dögum

Fanndís Birna Logadóttir skrifar
Svartur fössari nýtur sífellt meiri vinsælda hér á landi. Nokkur fyrirtæki, til að mynda Elko, bjóða upp á tilboð dagana fyrir til að hita upp.
Svartur fössari nýtur sífellt meiri vinsælda hér á landi. Nokkur fyrirtæki, til að mynda Elko, bjóða upp á tilboð dagana fyrir til að hita upp. Vísir/Vilhelm Gunnarsson

Einn stærsti verslunardagur heims gengur í garð á morgun. Black Friday, eða Svartur fössari eins og hann er iðulega kallaður hér á landi, hefur fest sig rækilega í sessi meðal Íslendinga. Fjölmargar verslanir bjóða upp á afslætti í tilefni dagsins. Sumir taka þó ekki þátt vegna umhverfissjónarmiða.

Það hefur eflaust ekki farið fram hjá mörgum að einn stærsti verslunardagur ársins er við það að ganga í garð. Auglýsingar hafa tekið að óma í útvarpi og síður dagblaðanna eru sömuleiðis fullar af auglýsingum frá hinum ýmsum fyrirtækjum um misháa afslætti.

Bandaríkjamenn fagna Þakkagjörðahátíðinni í dag og er um að ræða frídag þar í landi. Daginn eftir streyma Bandaríkjamenn í verslanir, oft á miðnætti, og kaupa vörur á töluverðum afslætti. Íslendingar hafa tekið upp þann sið.

Svartur föstudagur, svört vika og svartir dagar eru meðal þess sem fólk heyrir nú í sífellu en mörg fyrirtæki hafa tekið upp á því að bjóða upp á afslætti allt að viku fyrr, sem og yfir helgina til að tengja við Stafrænan mánudag, eða Cyber Monday, sem fer alltaf fram mánudaginn eftir Svartan föstudag.

Svartur föstudagur er tiltölulega nýtt fyrirbæri hér á landi en dagurinn nýtur sífellt meiri vinsælda með hverju ári sem líður. Með árunum hefur aukinn áhersla verið lögð á að finna séríslenskt heiti fyrir daginn og kom Katrín Jakobsdóttir, forsætisráðherra með áskorun á degi íslenskra tungu fyrr í mánuðinum.

„Ég skora bæði á verslanir og auglýsingastofur að næsti dagur sem er helgaður einhvers konar afsláttum verði kallaður Svartur fössari,“ sagði Katrín aðspurð um íslenskt heiti í kjölfar Dags einhleypra, eða Singles day eins og hann kallast úti í heim.

Af auglýsingum að dæma virðast flestar verslanir hafa svarað þessari áskorun forsætisráðherra og tekið upp heitið Svartur fössari. Önnur fyrirtæki hafa sömuleiðis búið til sín eigin heiti, eins og Heimkaup sem notar heitið Myrkir markaðsdagar yfir helgina.

Nokkur fyrirtæki, til að mynda Vegan búðin, hafa aftur á móti ákveðið að bjóða ekki upp á afslætti í tilefni dagsins og hvetja þess í stað til ábyrgrar neyslu. Sömu sögu má segja um ýmsar aðrar verslanir sem leggja upp úr sjálfbærni og umhverfisvænni framleiðslu.

Þá hefur útivistafyrirtækið 66°Norður farið þá leið að láta 25 prósent af allri sölu í vefverslun á Svörtum fössara renna til Jöklarannsóknafélagsins í stað þess að bjóða upp á afslætti. Markmiðið með samstarfinu er að standa vörð um íslensku jöklana og stuðla að aukinni vitundarvakningu um breytingarnar sem eru að eiga sér stað á þeim vegna hlýnunar í andrúmsloftinu.

Þannig hafa umhverfissjónarmið fengið nokkuð aukið vægi undanfarið en ekkert farasnið virðist þó vera á Svörtum fössara um þessar mundir, þar sem dagurinn hefur fest sig rækilega í sessi.


Tengdar fréttir

„Þetta er eitthvað sem maður þarf stöðugt að vera meðvitaður um“

Stærsti netverslunardagur heims er nú genginn í garð en dagurinn nýtur sífellt meiri vinsælda með hverju ári sem líður hér á Íslandi. Verkefnastjóri sjálfbærnimælikvarða hjá Reykjavíkurborg og ein af Loftslagsleiðtogum 2021, segir mikilvægt að fólk sé meðvitað þegar kemur að neyslu sinni til að draga úr neikvæðum áhrifum á umhverfið.

Sprenging átt sér stað í innlendri netverslun

Í nóvember jókst innlend netverslun um 353% milli ára og nam alls 7,6 milljörðum króna. Hlutfallslega var netverslun mest í raf- og heimilistækjaverslunum þar sem 41% af kaupum fóru fram í gegnum netið.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×