Dæmdur ís­lenskur kyn­ferðis­brota­maður grunaður um nauðgun í Hollandi

Fréttablaðið greindi frá þessu fyrr í dag. Maðurinn sem grunaður er um brotið er fertugur og hefur verið dæmdur hér á landi fyrir kynferðisbrot samkvæmt heimildum fréttastofu. Hlaut maðurinn fjögurra ára dóm í Héraðsdómi Reykjaness árið 2018 fyrir frelsissviptingu og nauðgun. Maðurinn hafði áður verið dæmdur fyrir kynferðisbrot. 

Ævar Pálmi Pálmason, yfirmaður kynferðisbrotadeildar lögreglunar, segir í samtali við fréttastofu að hann geti ekki tjáð sig um einstök mál á borði kynferðisbrotadeildarinnar. 

„Við erum með mál til rannsóknar um ofbeldi sem átti sér stað þarna í Hollandi. Ég get lítið tjáð mig að öðru leyti,“ segir Ævar. 

Samkvæmt frétt Fréttablaðsins gaf konan skýrslu hjá lögreglunni í Hollandi í síðustu viku en hún sé nú komin aftur heim til Íslands. Hún hafi einnig gefið skýrslu vegna málsins hér heima. 

Óvíst er hvort málið verði til meðferðar hjá íslensku lögreglunni en til þess þarf hollenska lögreglan að óska eftir aðkomu þeirrar íslensku. Fari málið fyrir dómstóla hér á landi og meintur gerandi sakfelldur fyrir verknaðinn er afar líklegt að hann hljóti meira en fjögurra ára dóm vegna síendurtekinna kynferðisbrota.