Móðir lýsir alvarlegum atvikum á Sælukoti

Móðir stúlkunnar segir að dóttir hennar hafi í þrígang sagt henni frá meintum brotum starfsmannsins. Hún vill dóttur sinnar vegna ekki koma fram undir nafni.

Yfirheyrði barnið

Fyrsta atvikið gerðist í september í fyrra þegar stúlkan var þriggja ára. Í kjölfarið var málið tilkynnt til barnaverndar, en starfsmanninum var ekki vikið úr starfi. Móðirin segir að rekstraraðili leikskólans hafi ákveðið upp á eigin spýtur að yfirheyra dóttur hennar vegna málsins.

„Og [rekstraraðilinn] hringir svo í mig og segir að hún hafi talað við barnið og að þær hafi komist að því að þetta hafi bara verið draumur. Og svo nokkrum vikum seinna sæki ég barnið í leikskólann og hún kemur inn í bíl grátandi og segir mér frá því að hún vilji ekki knúsa þennan starfsmann og að rekstraraðilinn hafi látið hana knúsa hann. Hljómaði eins og að hún hafi verið að láta þau sættast,“ sagði móðir stúlkunnar.

Hringdi daglega og spurði hvenær starfsmaðurinn mætti snúa aftur

Í júní á þessu ári fer stúlkan að sýna kynferðislega hegðun sem hún sagðist hafa lært af starfsmanninum.

„Hún reynir að kyssa mig fullorðinskossi. Ég ýti henni frá mér og spyr hvað þetta hafi verið og þá segir hún að starfsmaðurinn hafi kennt henni þetta.“

Þá tilkynnir móðirin málið til barnaverndar í annað sinn og fer fram á að starfsmaðurinn verði sendur í leyfi á meðan rannsókn málsins stendur. Rekstrarstjóri leikskólans verður við því.

„Á meðan er hún að hringja í mig nánast daglega og spurja hvenær hann megi koma aftur í vinnuna og hann sé svo þunglyndur yfir þessu öllu saman. Segir að hann gæti ekki hafa gert þetta því hann grét svo mikið þegar hún talaði við hann.“

Kærði málið til lögreglu

Í sumar sagði stúlkan móður sinni frá þriðja og alvarlegasta atvikinu og ákveður móðirin þá að taka hana úr leikskólanum og kærir málið til lögreglu. Hún gerir öðrum foreldrum viðvart um atvikin þar sem rekstrarstjóri leikskólans sagðist lögum samkvæmt ekki mega upplýsa foreldra um málið. Margir foreldrar verði þá uggangi og krefjast foreldrafundar.

„Og þar meðal annars koma fram nýjar reglur um að það megi ekki kyssa börnin á munninn og að starfsfólk megi ekki fara eitt af lóðinni með börnin.“

Borgin og leikskólinn hafi brugðist

Hún segir stjórn leikskólans og Reykjavíkurborg hafa brugðist í málinu.

„Alls staðar í kerfinu finnur maður ekki stuðning. Maður heyrir alltaf: „Hvað ef hann gerði þetta ekki í staðinn fyrir hvað ef hann gerði þetta.“

Líkt og Vísir greindi frá í gær sendu foreldrar og fyrrverandi starfsmenn bréf á Menntamálaráðuneytið, Reykjavíkurborg og fleiri þar sem þess er krafist að leikskólanum verði lokað. Í bréfinu lýsa þau yfir verulegum áhyggjum af aðbúnaði barna á leikskólanum og segja að börnin séu í hættu á hverjum degi.

Leikskólastjóri Sælukots hefur ekki viljað veita fréttastofu viðtal en staðfesti að starfsmaðurinn sem grunaður er um kynferðisbrot starfi ekki lengur á leikskólanum. 

Reykjavíkurborg hefur eftirlitshlutverk. Samkvæmt Helga Grímssyni, sviðsstjóra skóla- og frístundasviðs er verið að framkvæma úttekt á leikskólanum og munu fulltrúar borgarinnar funda með stjórnendum leikskólans í vikunni. 

Fréttastofa ræddi við mann sem var í foreldraráði Sælukots árið 2011 sem sagði að ráðið hefði á sínum tíma oft bent Menntamálaráðuneytinu og Reykjavíkurborg á slæman aðbúnað í leikskólanum en að lítið hafi verið um breytingar.

Allt of mörg börn á hvern starfsmann

Leiðbeinandi sem starfaði á Sælukoti í fyrra er mjög gagnrýnin á stjórnendur Sælukots og segir starfsmannamál einnig í ólagi.

 „Rosalega mörg börn voru á hvern starfsmann. Við megum bara hafa fjögur börn á hvern kennara en við vorum með tíu. Við vorum bara tvær sem sáum um ungbarnadeildina og það var enginn fagmenntaður kennari en eins og Reykjavíkurborg gefur út þá eiga að vera minnst 2/3 fagmenntaðir kennarar en það var ekki einu sinni einn,“ sagði Kristbjörg Helgadóttir, leiðbeinandi.

Þá segir hún að mörg kjarasamningsbundin réttindi hafi ekki verið virt. Starfsmenn hafi sjaldan fengið að fullnýta matarhlé.

„Ég komst síðan að því að starfsreynslan mín til sex ára var ekki metin til launa sem er kjarasamningsbrot. Og svo var líka enginn trúnaðarmaður.“