Heimsmeistararnir fóru örugglega í gegnum átta liða úrslitin

Fyrsti leikur liðanna náði aldrei að verða spennandi. Eftir að liðin höfðu fylgst nokkuð vel að fyrstu tíu mínútur leiksins tóku liðsmenn DWG KIA öll völd og tæpum tuttugu mínútum síðar var staðan orðin 1-0, heimsmeisturunum í vil.

Önnur viðureign liðanna bauð upp á mun meiri spennu en sú fyrsta og eftir aðeins fimm mínútna leik höfðu liðsmenn MAD Lions náð örlitlu forskoti.

Þeir héldu áfram að byggja ofan á forystu sína og tíu mínútum síðar höfðu þeir náð að vinna upp nokkuð afgerandi forystu. MAD Lions var með yfirhöndina lengi vel, en ríkjandi heimsmeistarar sýndu mikla þolinmæði. Eftir hálftíma leik skilaði þessi þolinmæði sér loksins og á einu augnabliki snérist leikurinn algjörlega við. Fimm mínútum síðar þrömmuðu liðsmenn DWG KIA þvert yfir kortið og staðan var orðin 2-0.

Heimsmeistararnir mættu svo mun ákveðnari til leiks í þriðju viðureign dagsins og náðu afgerandi forystu snemma. Í rauninni virtist aldrei spurning um hvorum megin sigurinn myndi enda, þrátt fyrir heiðarlega tilraun DWG KIA til að kasta leiknum frá sér eftir rúmlega tuttugu mínútna leik. Þá var forysta þeirra þó orðin svo mikil að það kom ekki að sök, og liðið kláraði nokkuð öruggan sigur.

DWG KIA er því á leið í undanúrslitin þar sem að gamla stórveldið T1 bíður þeirra. Heimsmeistararnir í DWG KIA hafa spilað ótrúlega vel á mótinu hingað til og hafa enn ekki tapað leik.

Átta liða úrslitin klárast á morgun þegar Gen.G og Cloud9 eigast við og berjast um seinasta lausa sætið í undanúrslitum. Líkt og áður hefst bein útsending á Stöð 2 eSport klukkan 12:00.