245 leituðu á bráðamóttöku Landspítala vegna rafhlaupahjólaslysa í júní, júlí og ágúst, sem er talsverð aukning miðað við sama tímabil í fyrra þegar 149 leituðu á bráðamóttökuna. Þetta kemur fram í nýrri tölfræði frá bráðamóttökunni sem birt var í dag.

„Mér finnst rétt að skoða það í samhengi við að það hefur orðið gríðarleg aukning í notkun á rafskútum. Þannig höfum við upplýsingar um það frá borgaryfirvöldum að skráðar ferðir hjá rafskútuleigum hafi verið tæplega 700 þúsund á höfuðborgarsvæðinu og við vitum að það er líka mikill fjöldi í einkaeigu,“ segir Hjalti Már Bjarnason, yfrlæknir á bráðamóttöku Landspítala.

„Þannig að varlega áætlað getum við sagt að það séu væntanlega hátt í milljón ferðir á rafskútum í sumar. Þó að öll slys séu eitthvað sem við viljum forðast þá eru 245 slys í samhengi við gríðarlegan fjölda ferða hugsanlega ekki mjög hátt.“

Sumarið 2020 hafi 40 prósent fullorðinna sem leituðu á bráðamóttöku vegna rafskútuslysa verið undir áhrifum áfengis eða annarra vímugjafa.

„Við sjáum það núna í sumar að fjölgunin er fyrst og fremst að verða um helgar og einkum í kringum miðnætti, og það er mjög sterk vísbending um að áfengi eigi stóran þátt í þessum slysum,“ segir Hjalti. Almennt séu slysin ekki alvarleg.

„Það voru fjórir einstaklingar sem þurftu að leggjast inn á spítalann og því miður hafa orðið alvarleg slys út af notkun á rafskútum en í flestum tilfellum eru þetta áverkar sem teljast minniháttar í heilbrigðiskerfinu en geta að sjálfsögðu haft talsverðar afleiðingar fyrir þann sem fyrir slysinu verður,“ segir Hjalti. Sökum þess hversu fáir hafi hlotið alvarlega áverka eftir rafskútuslys geti hann ekki farið út í það í smáatriðum hvernig alvarlegustu tilfellin lýsi sér.

„Það má segja að algengast séu beinbrot og það er ekki óalgengt að fólk hljóti andlitsáverka við að detta á andlitið á þessum farartækjum.“

Niðurstöðurnar eftir sumarið komi ekki á óvart. Þær sýni hversu slæm hugmynd það sé að ferðast ölvaður á rafskútu og að fræða eigi betur um hættur sem af því stafa.

„Ég held það ætti líka að skoða leiðir eins og að efla næturstrætó eða almenningssamgöngur á næturnar til að fækka þeim sem kjósa þennan fararmáta undir áhrifum áfengis. En síðan finnst mér líka áberandi að fólk er að detta í fyrsta sinn sem þeir prófa þetta,“ segir Hjalti.

„Aðalmálið er að vera ekki fullur og fimmtugur á föstudagskvöldi að prófa þetta í fyrsta skipti. Það endar oft ekki vel.“