Körfubolti

Grindvíkingar fundu eftirmann Dags í Ísrael

Óskar Ófeigur Jónsson skrifar
Naor Sharon Sharabani í leik með Val á móti Grindavík fyrir tveimur árum.
Naor Sharon Sharabani í leik með Val á móti Grindavík fyrir tveimur árum. Vísir/Daníel Þór

Grindvíkingar hafa styrkt liðið sitt fyrir komandi tímabil í úrvalsdeild karla í körfubolta og fundið um leið mann fyrir leikstjórnandann Dag Kár Jónsson sem fór á dögunum út í atvinnumennsku.

Grindavík samdi við ísraelska leikstjórnandann Naor Sharon Sharabani. Hann er 26 ára gamall og er jafnframt með franskt vegabréf.

Naor er ekki ókunnur íslenskum körfubolta því hann lék með Valsmönnum tímabilið 2019 til 2020. Hann lék með Valsmönnum seinni hlutann af tímabilinu og var með 13,8 stig að meðaltali og gaf 6,9 stoðsendingar í leik.

Hann lék síðast með Maccabi Haifa í heimalandinu. Naor er 193 cm á hæð og mætir í góðu leikformi frá Ísrael samkvæmt frétt á síðum Grindvíkinga.

„Við erum mjög ánægðir með að vera búnir að finna leikstjórnenda sem mun leysa Dag Kár af hólmi. Við þurftum að bregðast hratt við og er mjög sáttir með að fá Naor til liðs við okkur. Þetta er öflugur leikmaður sem mun styrkja okkar lið,“ segir Daníel Guðni Guðmundsson, þjálfari Grindavíkur, í viðtali á Instagram síðu Grindavíkur.

Naor Sharon Sharabani er væntanlegur til landsins núna í vikunni og verður mögulega kominn með leikheimild fyrir fyrsta leik Grindavíkur sem er gegn Þór Akureyri næstkomandi föstudag.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.