Lúxus­hótelið við Hörpu opnar loks í næstu viku og býður opnunar­til­boð

Nú er hægt er að bóka gistingu á heimasíðu hótelsins frá og með 12. október næstkomandi en 253 herbergi standa þar gestum til boða. 

Í bókunarvél hótelsins má finna verð á bilinu 80.000 til 500.000 krónur nóttin en veittur er 25% afsláttur af hefðbundnu gistináttaverði fyrstu vikurnar. Er dýrast að gista í hornsvítu með sjávarútsýni en ekki liggur fyrir hversu háa kortaheimild gestir þurfa að vera með til að tryggja sér nótt í þakíbúðinni sjálfri (e. penthouse).

Hótelið er hluti af nýrri lúxuskeðju á vegum Marriott International og er hugsað sem ráðstefnuhótel fyrir Hörpu. Það er um 17.000 fermetrar að stærð á sex hæðum og kjallara og má þar meðal annars finna veitingastað, þakbar, fundarherbergi, veislusal, heilsulind og önnur þægindi.

Kostað um 20 milljarða króna

Banda­ríska fasteignaþróunarfyrirtækið Carpenter & Company stóð fyrir framkvæmdinni og sagði Richard L. Friedman, forstjóri þess í samtali við RÚV árið 2019 að byggingin myndi kosta um 20 milljarða króna. 

Þá stóð til að opna hótelið árið 2020 en ekkert varð úr þeim fyrirætlunum. Í upphafi þessa árs greindi Friedman svo frá því að það hótelið yrði opnað vorið 2021 og veita 3-400 manns atvinnu.

Upphaflega var gert ráð fyrir að kostnaður við bygginguna næmi um 16 milljörðum króna og hefur hann því aukist umtalsvert á verktímabilinu. Á meðal stærstu fjárfesta í verkefninu eru íslenskir lífeyrissjóðir, auk nokkurra einstaklinga og fasteignaþróunarfélagsins Carpenter & Company.

Talið er að geng­is­styrk­ing krónunnar hafi meðal annars haft áhrif á áætlana­gerð og fjár­mögn­un verk­efn­is­ins þar sem stór hluti hennar kemur erlendis frá. 

Erfitt að byggja fimm stjörnu hótel á Íslandi

Árið 2019 hafnaði Friedman því að hótelbyggingin yrði sú dýrasta í Evrópu og sagði að það feli í sér áskoranir að byggja fimm stjörnu hótel á Íslandi.

„Íslenskir verktakar hafa ekki byggt fimm stjörnu hótel áður. Það gefur augaleið. Það er allt öðruvísi en að byggja íbúðablokk eða skrifstofubyggingu. Þannig að það hefur verið áskorun. Við redduðum því með því að fá inn ráðgjafa frá Evrópu og frá New York. Marriott er líka þannig vörumerki að það eru miklar kröfur sem þarf að uppfylla.“

Upphaflega stóð til að The Reykjavík Edition fengi að titla sig fyrsta fimm stjörnu hótelið á Íslandi en síðan þá hafa Hótel Grímsborgir í Grímsnesi og Retreat Hotel við Bláa lónið fengið fimm stjörnu viðurkenningu. Verður The Reykjavík Edition þar með fyrsta fimm stjörnu hótelið á höfuðborgarsvæðinu.

Fleiri stór hótel rísa í miðbæ Reykjavíkur

Auk The Reykjavík Edition stendur til að opna tvö önnur hótel í miðbæ Reykjavíkur á næstu misserum. 

Á Landsímareitnum við Austurvöll vinnur fasteignaþróunarfélagið Lindarvatn að því að reisa 163 herbergja hótel sem mun bera heitið Iceland Parliament Hotel. Verður hótelið rekið af Icelandair Hotels undir Curio Collection merki Hilton-keðjunnar og stendur til að opna það síðar á þessu ári.

Þá vinnur Íslandshótel að því að opna 125 herbergja hótel næsta vor við Lækjargötu sem ber heitið Hótel Reykjavík.

Fréttin hefur verið uppfærð: Myndir sem voru fengnar af heimasíðu The Reykjavík Edition og prýddu upphaflega útgáfu fréttarinnar voru ekki lýsandi fyrir hönnun þess heldur útlit annarra hótela í keðjunni.