Legó styrkir UNICEF um níu milljarða til að dreifa bóluefni

Heimsljós 29. september 2021 10:19

Með styrknum verður LEGO Foundation stærsti styrktaraðili UNICEF í þessum verkefnum úr hópi einkaaðila.

LEGO Foundation hefur tilkynnt um 70 milljóna dala styrk til UNICEF, Barnahjálpar Sameinuðu þjóðanna, vegna verkefna stofnunarinnar innan COVAX-samstarfsins og ACT-A. Með styrknum, sem jafngildir ríflega 9 milljörðum króna, verður LEGO Foundation stærsti styrktaraðili UNICEF í þessum verkefnum úr hópi einkaaðila. Framlagið er hluti af loforði sjóðsins um að leggja 150 milljónir dala til að styðja við börn og fjölskyldur þeirra vegna heimsfaraldurs COVID-19 um allan heim.

Í frétt frá UNICEF segir að framlagið muni flýta mjög fyrir bólusetningu á framlínustarfsmönnum á borð við heilbrigðisstarfsmönnum, kennurum og forráðamönnum barna.

„Síðustu átján mánuði hefur líf milljóna barna um allan heim verið sett á bið vegna heimsfaraldursins,“ segir Henrietta Fore, framkvæmdastjóri UNICEF.

„Börn, líkt og við hin, vilja endurheimta venjulegt líf sitt. UNICEF trúir því að með jafnt aðgengi allra að bóluefni við COVID-19 sé öruggasta leiðin fyrir allar þjóðir út úr þessum heimsfaraldri. Við erum afar þakklát Lego Foundation fyrir að deila þeirri bjargföstu trú okkar og vonum að rausnarlegur stuðningur þeirra verði öðrum stofnunum, fyrirtækjum og einstaklingum innblástur.“

Eins og staðan er í dag hafa 5,8 milljarðar bóluefnaskammta verið gefnir um allan heim. Aðeins tvö prósent þeirra hafa farið til Afríku.

Fjármagnið frá Lego Foundation mun nýtast til að styðja við dreifingu UNICEF á bóluefnum og aðstoð við framkvæmd fullbólusetningar 14 milljóna einstaklinga við eðlilegar aðstæður, og rúmlega 10 milljónir einstaklinga sem búa við mannúðarkrísu.

„Framlag okkar byggir á kjarnagildum Lego Foundation um að finna skapandi lausnir á erfiðum áskorunum, huga að börnum og samfélögum þeirra og í krafti samstarfs að taka á vandamálum og tækifærum sem stafa af heimsfaraldri COVID-19,“ segir Anne-Birgitte Albrectsen, forstjóri Lego Foundation, í tilkynningunni.

UNICEF og Lego Foundation hafa starfað saman frá árinu 2015 með áherslu á velferð og valdeflingu barna í gegnum skapandi leik og lærdóm.

Þessi grein er hluti af samstarfi Vísis og utanríkisráðuneytisins um miðlun frétta af þróunarsamstarfi Íslands um allan heim. Fréttin birtist fyrst í Heimsljósi, upplýsingaveitu utanríkisráðuneytisins um þróunar- og mannúðarmál.

Þróunarsamvinna Faraldur kórónuveiru (COVID-19) Bólusetningar

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.