Auglýsa eftir hundrað flugliðum og fimmtíu flugmönnum

Atli Ísleifsson skrifar 29. september 2021 08:07

Áætlað er að starfsmannafjöldi Play muni tvöfaldast í kjölfar ráðninganna. play

Flugfélagið PLAY leitar nú að um hundrað flugliðum til starfa fyrir næsta vor, bæði í framtíðar- og sumarstörf. Jafnframt stendur til að auglýsa eftir um fimmtíu flugmönnum í næstu viku.

Í tilkynningu frá flugfélaginu segir að um sé að ræða stærstu ráðningu félagsins í einu vetfangi. Starfsmannafjöldi Play mun með þessum ráðningum tvöfaldast.

„Nú þegar starfa fimmtíu flugliðar hjá félaginu en ráðningarnar eru í takt við enn frekari umsvif PLAY sem mun taka þrjár nýjar flugvélar í notkun næsta vor. Félagið er nú þegar með þrjár vélar í rekstri. Þá er áformað að bæta við fjórum vélum árið 2023 og verða þá enn fleiri ráðnir til starfa,“ segir í tilkynningunni.

Ennfremur segir að til standi að ráða bæði flugliða með og án reynslu.

Varfærnar áætlanir

Haft er eftir Birgi Jónssyni, forstjóra Play að áætlanir flugfélagsins hafi verið varfærnar við ríkjandi aðstæður. Skýr hraustleikamerki í ferðaþjónustunni auk breytinga á sóttvarnarráðstöfunum geri það að verkum að nú er tímabært að fara að manna vélarnar fyrir næsta sumar.

„Ég er vægast sagt spenntur að fá nýtt fólk í liðið okkar og við erum stolt af því að við séum að skapa öll þessi nýju störf. Það eru ekkert nema spennandi tímar fram undan og það verður ekki bara spennandi heldur líka gaman að starfa hjá okkur,“ er haft eftir Birgi.

Play Fréttir af flugi Vinnumarkaður Ferðamennska á Íslandi

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.