Tom Brady tapaði í fyrsta sinn síðan í nóvember 2020 og Mahomes tapaði líka

Það er ekki oft sem Tom Brady og Patrick Mahomes tapa leikjum hvað þá báðir á sama deginum en þetta var þannig dagur í gær þegar þriðja umferð NFL-deildarinnar fór fram.

Tom Brady og félagar höfðu unnið tvo fyrstu leiki sína og alla leiki sína síðan í nóvember í fyrra. Liðið brunaði í gegnum úrslitakeppnina og tryggði sér Super Bowl bikarinn. Þetta tímabil byrjaði síðan á tveimur sannfærandi sigrum.

Í gær áttu liðsmenn Tampa Bay Buccaneers ekki svar við öflugu liði Los Angeles Rams sem vann þá 34-24. Rams fékk leikstjórnandann Matthew Stafford fyrir tímabilið og hann hefur farið á kostum í upphafi. Stafford átti fjórar snertimarkssendingar í gær og tvær þeirra enduðu hjá útherjanum Cooper Kupp.

Patrick Mahomes og félagar í liði Kansas City Chiefs hafa nú tapað tveimur leikjum í röð eftir 30-24 tap á móti Los Angeles Chargers í gær.

Justin Herbert keyrði áfram lokasókn Charges meistaralega og fann að lokum útherjann Mike Williams sem skoraði snertimark 32 sekúndum fyrir leikslok. Mahomes náði ekki að svara og Chiefs liðið hefur tapað tveimur leikjum í röð í fyrsta sinn í tvö ár.

Fimm lið í deildinni eru enn taplaus eftir þrjár fyrstu umferðirnar en það eru Carolina Panthers, Las Vegas Raiders, Denver Broncos, Arizona Cardinals og Los Angeles Rams.

Las Vegas Raiders vann sinn leik í framlengingu þar sem sparkarinn Daniel Carlson skoraði vallarmarkið sem réði úrslitunum. Þetta er besta byrjun Raiders síðan 2002.

Baltimore Ravens, Atlanta Falcons og Green Bay Packers unnu líka öll á vallarmarki um leið og leiktíminn rann út.

Green Bay Packers fékk skell í fyrsta leik en hefur síðan svarað með tveimur sigurleikjum í röð. Liðið varð fyrsta liðið til að vinna San Francisco 49ers í nótt. Aaron Rodgers keyrði upp lokasóknina sem endaði með því að sparkarinn Mason Crosby skoraði vallarmark af 51 jarda færi.

Joe Burrow og útherjinn Ja'Marr Chase eru að finna taktinn saman og Chase skoraði tvö snertimörk eftir sendingar frá Burrow þegar Cincinnati Bengals vann erkifjendur sína í Pittsburgh Steelers. Þetta var fyrsti sigur Bengals liðsins á Steelers síðan árið 2015.

Josh Allen átti frábæran leik í 43-21 sigri Buffalo Bills á Washington. Allen sendi fjórar snertimarkssendingar og skoraði líka eitt snertimark sjálfur. Það var ekki slæmt að vera með hann í Fantasy í gær.