Flutti frá Los Angeles til Íslands til að markaðssetja sultur

Eiður Þór Árnason og skrifa 22. september 2021 10:26

Belinda Navi hefur meðal annars starfað fyrir Belkin International. Aðsend

Good Good hefur ráðið Belindu Navi í starf markaðsstjóra með aðsetur í höfuðstöðvum fyrirtækisins í Reykjavík. Belinda Navi fluttist búferlum frá Los Angeles til Reykjavíkur til að starfa fyrir Good Good og hefur þegar hafið störf.

Þetta kemur fram í tilkynningu frá fyrirtækinu. Garðar Stefánsson, framkvæmdastjóri hjá Good Good, segir að ráðningin komi til með að styrkja markaðsstarf sprotafyrirtækisins á heimsvísu, einkum í Norður-Ameríku.

„Belinda er með yfirgripsmikla reynslu sem mun nýtast Good Good vel við vörumerkjaþróun, markaðsrannsóknir og við að greina ný markaðstækifæri,“ segir hann í tilkynningu.

Var markaðsstjóri hjá WePlay Networks

Belinda Navi er með MBA gráðu frá INSEAD og B.A bókmenntagráðu frá Brown University. Hún starfaði áður sem markaðsráðgjafi fyrir viðskiptavini á borð við Amobee Inc, Belkin International og SunAsia Energy Inc og sem markaðs- og þróunarstjóri fyrir WePlay Networks.

Good Good er íslenskt sprotafyrirtæki sem sérhæfir sig í þróun og framleiðslu á matvælum án viðbætts sykurs. Vöruframboðið samanstendur meðal annars af sultum, sætuefnum og keto-börum.

Vöruþróun fyrirtækisins, auk sölu- og markaðsstarfs, fer fram á Íslandi en framleiðsla fer fram í Hollandi og Belgíu. Að sögn forsvarsmanna fást vörur fyrirtækisins nú í rúmlega tíu þúsund verslunum í sextán löndum.

Vistaskipti Matur Nýsköpun

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.