Í um­fangs­mikilli nýrri Maskínu­könnun, þar sem rúm­lega 2.000 kjós­endur svara, blasir við ný mynd. Þar mælast bæði Flokkur fólksins og Mið­flokkurinn með 4,5 prósenta fylgi og því alls­endis ó­víst hvort þeir nái manni á þing.

Fari svo er ljóst að þeim mun fleiri jöfnunar­sæti koma í hlut annarra flokka.

Birgir Þórarins­son, odd­viti Mið­flokksins í Suður­kjör­dæmi, verður gestur í Kosningapallborðinu, sem verður í beinni á Vísi klukkan 14 í dag. Þar verður hann inntur eftir við­brögðum við rýru gengi flokksins í síðustu skoðana­könnunum.

Á­samt Birgi mæta þau Þór­hildur Sunna Ævars­dóttir, odd­viti Pírata í Suð­vestur­kjör­dæmi, og Ás­mundur Einar Daða­son, fé­lags- og barna­mála­ráð­herra og odd­viti Fram­sóknar­flokksins í Reykja­vík norður, í Kosninga­pall­borðið.

VG tapar fylgi

Sjálfstæðisflokkurinn er áfram langstærsti flokkurinn á Alþingi með 23,9 prósenta fylgi. Fylgi flokksins breytist ekki mikið milli kannana en í síðustu könnun Maskínu sem birtist fyrir tveimur vikum var flokkurinn með 23,4 prósent.

Sjálfstæðisflokkurinn er hér um bil tvöfalt stærri en næsti flokkur fyrir neðan, sem eru Vinstri grænir með 12,5 prósent. 

Fylgi Vinstri grænna fer niður um tæp tvö prósentustig frá síðustu könnun þegar flokkurinn mældist með 14,2 prósenta fylgi. Hann hefur ekki mælst með minna fylgi í könnunum Maskínu síðan snemma árs. 

Vinstri græn eru hins vegar á sama reki og næstu fjórir flokkar á eftir. 

Samfylkingin er með 12,3 prósenta fylgi, Viðreisn með 11,7 prósent, Framsókn með 11,5 prósent og Píratar með 11,2 prósent.

Sósíalistar bæta áfram við sig

Sósíalistaflokkurinn er eini flokkurinn sem hefur verið í jöfnum og þéttum vexti á kosningaárinu. Eftir að hafa mælst í kringum fimm prósentin fram á mitt sumar má segja að flokkurinn hafi bætt við sig um tveimur til þremur prósentustigum eftir að listar voru kynntir.

Hann stendur nú í 7,9 prósentum og hefur aldrei verið stærri samkvæmt Maskínukönnun. Hann mældist með 6,9 prósenta fylgi í síðustu könnun Maskínu og bætir því við sig einu prósentustigi síðan þá. 

Hér má sjá mat stjórnmálafræðiprófessors á síðustu könnun frá því í lok ágúst:

Ríkisstjórnin héldi líklega velli

Ríkisstjórnarflokkarnir mælist með samtals 47,9 prósenta fylgi. Þar sem fjöldi atkvæða fellur dauður niður, nái hvorki Miðflokkur né Flokkur fólksins inn, er ekki ólíklegt að það dugi stjórninni til að halda velli.

Vinstristjórn virðist þá ekki möguleg án Framsóknarflokks eða Viðreisnar.