Innlent

KSÍ-málið bætist við þétta dagskrá á Fundi fólksins

Kolbeinn Tumi Daðason skrifar
Frá setningu Fundar fólksins árið 2016. Guðni Th. Jóhannesson var við setningu fundarins þá eins og nú.
Frá setningu Fundar fólksins árið 2016. Guðni Th. Jóhannesson var við setningu fundarins þá eins og nú. Fundur fólksins

Fundur fólksins hefst í dag og segir verkefnastjóri fundarins fólk ekki eiga að missa af neinum viðburði. Síðasti viðburður á þétta dagskrá er umræður Kvenréttindafélags Íslands um menninguna í íþróttahreyfingunni sem ber yfirskriftina Rauða spjaldið: Kynjamisrétti og ofbeldi í íþróttahreyfingunni.

Fundur fólksins hefur verið haldinn hér á landi frá árinu 2015 en féll niður í fyrra vegna Covid-19. Fundurinn fer fram í Norræna húsinu, Fenjamýri í Grósku og Öskju en áhugasamir geta líka fylgst með streymi hér á Vísi.

Pála Hallgrímsdóttir, verkefnastjóri Fundarins, segir viðburði fara fram í fimm sölum.

Stjórnmálaflokkar fé einkunn frá Ungum umhverfissinnum

„Nýjungin á Fundi fólksins í ár er áhersla á ungt fólk og lýðræði, og þess vegna er fyrri dagur Fundarins helgaður ungu fólki, skipulagður í samstarfi við ungliðasamtök. Umhverfismálin vega þungt hjá ungu fólki og það setur mark sitt á daginn og reyndar Fundinn allan,“ segir Pála.

Þar nefnir hún athyglisverðan viðburð hjá Ungum umhverfissinnum, þar sem þau opinbera einkunnagjöf til stjórnmálaflokkanna fyrir frammistöðu þeirra í umhverfis- og loftslagsmálum.

Ungt fólk hefur mótmælt aðgerðarleysi í loftslagsmálum.Vísir/Vilhelm

„Covidástandið eins og það snýr að ungmennum, bæði hvað varðar líðan á tímum Covid og atvinnumál ungmenna verður áberandi í umræðu dagsins. Hinseginleikinn verður líka á dagskrá og ungliðasamtök og nemendur rukka unga frambjóðendur um afstöðu þeirra til ýmissa mála sem snúa að þeim. Eldri borgarar og ungliðar taka síðan samtalið um sameiginleg hagsmunamál þessara þjóðfélagshópa.“

Föstudeginum lýkur síðan með tónlistarviðburði sem hinir geysivinsælu ClubDub sjá um.

Stjórnmálamenn fjölmenna

Pála segir umhverfismálin verða áfram í brennidepli á laugardeginum. Sömuleiðis umræða um loftslagsmálin og hringrásarhagkerfið. Skuggahliðar Covid-19 eins og þær snúa að heimilisofbeldi verða til umfjöllunar í viðburðinum Faraldur í faraldrinum.

„Og það kemur ekki á óvart, að forystumenn stjórnmálaflokkanna eru kallaðir til samtals um stefnur og kosningaloforð, og eru auk þess gestir í fjölmörgum viðburðum, eins og til dæmis umfjöllun um bágt ástand í þjónustu við fullorðna einstaklinga með ADHD.“

Katrín Jakobsdóttir forsætisráðherra opnar fundinn.Vísir/Vilhelm

Fundur fólksins er framkvæmdur í öflugu samstarfi við m.a. Norræna húsið og ber dagskrá beggja daga þess vitni þar sem spurningum er velt upp um norræna samvinnu og skort á norrænni samvinnu. Þá viljum við nefna athyglisvert málþing Mannréttindaskrifstofu Íslands sem nær yfir hálfan dag og er þar tæpt á fjölmörgum málum sem snúa að mannréttindum.

Þá segir Pála viðburð líðandi viku fá sinn sess í dagskránni, þar sem Kvenréttindafélag Íslands ræðir menninguna í KSÍ.

Nálægð við fólk í valdastöðu

Lýðræðislega kosnir fulltrúar þjóðar og borgar opna hátíðina. Forseti Íslands, forsætisráðherra og borgarstjóri, ásamt tveimur ungmennum sem láta sig lýðræði varða og gefa tóninn fyrir hátíðina.

Pála leggur áherslu á að Fundur fólksins sé einstakur vettvangur þar sem skapaður sé rammi fyrir samtal milli almennings, stjórnmálamanna, frjálsra félagasamtaka og einkageirans með lýðræðislega hugsun að leiðarljósi.

Dagskráin á föstudeginum.

„Umræðan hvelfist um samfélagsmál af öllum toga. Fundurinn er fyrst og fremst vettangur, en þátttakendur velja hvort þeir skrái sig til þátttöku og velja sína viðmælendur. Gestir fundarins taka jafnan þátt í samtalinu, oft með spurningum úr sal og streymi, en líka með viðveru og spjalli við aðra á svæðinu, oft stjórnmálamenn sem erfitt getur verið að nálgast ella. Fólk hittist þannig undir formlegum og óformlegum kringumstæðum. Í Danmörku til dæmis er hefð fyrir því að forystumenn stjórnmálaflokkanna sýni samtímis á sér minna hátíðlega hlið og taka þá þátt í alls kyns skrýpalátum; brauðbökunarkeppni, óvenjulegri spurningakeppni eða þvíumlíku og gera óspart grín hver að öðrum.“

Dagskráin á laugardeginum.

Landsmenn ganga til kosninga 25. september. Pála segir mörg félagasamtök í ár gera ráð fyrir stjórnmálamönnum í viðburði sínum og þeir brugðist vel við þátttöku.

„Þarna gefst einstakt tækifæri fyrir félagasamtök og almenning að koma afstöðu sinni til skila til valdhafa og valdhafa að hlusta og greina frá skoðunum sínum.“

Að vinna sér sess

Pála segir Fund fólksins ungt fyrirbæri á Íslandi, en sé smám saman að vinna sér sess.

„En á sambærilegum fundum hinna Norðurlandanna hafa fundirnir fengið þann sess, að það er nánast enginn maður með mönnun - og þá er sérstaklega átt við félagasamtök, stjórnmálamenn og fjölmiðla - nema að vera virkir þátttakendur á fundunum.“

Saga Fundar fólksins

Uppruna Fundar fólksins má rekja til þess, að Olof Palme var fenginn til þess a halda ræðu í Almedalen. Þetta var árið 1968 og Olof var á þeim tíma menntamálaráðherra. Það var boðað til fundarins undir yfirskriftinni „Komið, spyrjið, hlustið og njótið“.

Þessi orð eru lýsandi fyrir þá hugsun sem liggur að baki þessum fundum. Smám saman breiddist frumkvæðið út á Norðurlöndunum, og víðar, og nú eru til samtök Lýðræðishátíða. Á Íslandi var fyrsti Fundur fólksins haldinn 2015 í Norræna húsinu að frumkvæði hússins. Árið eftir tók Almannaheill, regnhlífarsamtök þriðja geirans við hátíðinni og fór hún fram haustið 2016 í Norræna húsinu en árin

2017- 2019 var fundurinn haldinn í samvinnu við menningarhúsið Hof á Akureyri, síðast undir nafninu LÝSA-Rokkhátíð samtalsins. Fundinum var aflýst vegna Covid-19 í fyrra. Nú er Fundur fólksins kominn á höfuðborgarsvæðið aftur, undir upprunalegu nafni og er það Norræna félagið á Íslandi sem sér um framkvæmd fundarins í samvinnu við Almannaheill, Norræna húsið og fjöldan allan af hagaðilum.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.