Viðskipti innlent

TT3 kaupir Ormsson og SRX

Kolbeinn Tumi Daðason skrifar
Kjartan Örn Sigurðsson framkvæmdastjóri SRX mun stýra sameinuðu félagi.
Kjartan Örn Sigurðsson framkvæmdastjóri SRX mun stýra sameinuðu félagi. Aðsend

TT3 ehf. hefur keypt allt hlutafé í raftækjaheildversluninni SRX ehf. og Ormsson ehf. Með kaupunum munu fyrirtækin SRX ehf. og Ormsson ehf. verða sameinuð sem mun gefa mikla möguleika á kostnaðarhagræðingu og aukinni hagkvæmni vegna stærðar og breiddar, segir í tilkynningu. Kaupin hafa verið samþykkt af Samkeppniseftirlitinu.

SRX hefur á undanförnum árum verið ein af stærstu raftækjaheildverslunum landsins og eru vöruflokkar fyrirtækisins farsímar, rafmagnshlaupahjól, heyrnatól, spjaldtölvur og aðrar vinsælar vörur á markaði.

Meginstarfsemi Ormsson er innflutningur og sala á heimilistækjum, sjónvörpum og hljómtækjum auk innflutnings og sölu á eldhúsinnréttingum. Ormsson er umboðsaðili fyrir sum af þekktustu vörumerki í heimi, Samsung, AEG, Bang & Olufsen, Nintendo, Sharp, HTH o.fl.

Í tilkynningu frá TT3 ehf. segir að tilgangur og markmið SRX með kaupunum á Ormsson séu að styrkja innviði félagsins með auknu aðgengi að mannauði, þekkingu, lagerhúsnæði og breiðara vöruvali. Þannig muni sameinað félag leitast við að hámarka nýtingu framleiðsluþátta og bjóða betri þjónustu við viðskiptavini með aukinni stærðarhagkvæmni og meira vöruúrvali.

Áætluð ársvelta hins sameinaða félags verður um sex milljarðar króna með um sextíu starfsmenn. Eigendur fyrirtækisins eru Kjartan Örn Sigurðsson, Ingvi Týr Tómasson og Guðmundur Pálmason.

Kjartan Örn Sigurðsson framkvæmdastjóri SRX mun stýra sameinuðu félagi. Kjartan er í tilkynningu sagður þaulreyndur á sviði alþjóðaviðskipta, bæði í heildverslun og á sviði smásölu. Kjartan Örn segist sjá mikil tækifæri með kaupunum:

„Ormsson er sterkt vörumerki og í fyrirtækinu er mikið af reynslumiklu starfsfólki með mikla þekkingu. Við höfum trú á vörumerkinu Ormsson til framtíðar. Sameining fyrirtækjanna skilar hagkvæmari rekstri, auknu vöruframboði og bættu aðgengi að vörum á markaði sem mun stuðla að aukinni þjónustu við viðskiptavini sameinaðs félags.“

Andrés B. Sigurðsson fráfarandi forstjóri og aðaleigandi Ormsson er þakklátur þeim sem hafa verið tengdir fyrirtækinu í áratugi en segist jafnframt sjá ný tækifæri til vaxtar með nýjum eigendum:

„Eigendur Ormsson ehf., sem hafa verið tengdir fyrirtækinu í áratugi vilja þakka samstarf við fyrirtæki og einstaklinga, sem hafa verið traustur viðskiptavinahópur í nær hundrað ára sögu þess. Nýir eigendur eru reyndir í viðskiptum hér á landi og erlendis. Með sameiningu fyrirtækja koma ný tækifæri til vaxtar og þróunar til lengri tíma. Óskum við, fyrrum eigendur, hinum nýju farsældar og megi tryggir viðskiptamenn njóta góðra viðskipta og samstarfs til framtíðar.“





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×