Veiði

100 sm lax í Blöndu

Karl Lúðvíksson skrifar
Þessi 100 sm hængur veiddist í Blöndu í gær
Mynd: Erik Koberling FB

Þó að það sé heldur rólegt yfir veiðinni í Blöndu eru veiðimenn að setja í stórlaxa inn á milli en það er nákvæmlega það sem Blanda getur verið þekkt fyrir.

Í gær var níu löxum landað í Blöndu en það þykir ekki há tala á þessum tíma sem er að öllu jöfnu sá besti í ánni. Í síðustu viku var heildarveiðin aðeins 33 laxar í ánni en það er eins og meðalhollið ætti að vera með á þessum tíma. Flestir eru nú sammála því að það sé óþarfi að blása veiðisumarið af þar sem þetta virðist vera mun seinna á ferðinni en á venjulegu ári en það er engu að síður ljóst að það stefnir ekki í gott.

Ljósu punktarnir eru þegar fallegum vænum löxum er landað en í gær náðist einmitt einn slíkur á land sem mældist 100 sm og var að sjálfsögðu sleppt aftur að viðureign lokinni. Nú bíða veiðimenn eftir því að sjá hvað næsti stóri straumur kemur til með að skila en að honum loknum er nokkurn veginn hægt að segja fyrir víst hvernig framhaldið verður.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.