Innlent

Vilja hafa upp á bréfritara úr utanríkisráðuneytinu

Kjartan Kjartansson og Kolbeinn Tumi Daðason skrifa
Bréfið var stílað á Svartagaldur, fyrirtæki Guðbjörns Dan, móðurbróður Hauks Hilmarssonar. Höfundur bréfsins sagði ekki til nafns en sagðist hafa unnið í utanríkisráðuneytinu.
Bréfið var stílað á Svartagaldur, fyrirtæki Guðbjörns Dan, móðurbróður Hauks Hilmarssonar. Höfundur bréfsins sagði ekki til nafns en sagðist hafa unnið í utanríkisráðuneytinu. Guðbjörn Dan Gunnarsson

Fjölskylda Hauks Hilmarssonar sem talið er að hafi fallið í Sýrlandi reynir nú að hafa upp á óþekktum bréfritara sem heldur því fram að einstaklingur í utanríkisráðuneytinu hafi unnið að því að þagga málið niður.

Haukur gekk til liðs við vopnaðar sveitir Kúrda sem börðust gegn Íslamska ríkinu í Sýrlandi. Talið er að hann hafi fallið í loftárás Tyrkja í Afrin-héraði í Sýrlandi árið 2018. Hann var 31 árs gamall.

Fjölskylda Hauks reyndi að fá íslensk stjórnvöld til þess að fá Tyrki til þess að skila líki hans til Íslands. Hún hefur verið afar ósátt við viðbrögð utanríkisráðuneytisins við málinu og sakað það um aðgerðaleysi. Guðlaugur Þór Þórðarson, utanríkisráðherra, sagði allt hafa verið reynt til að komast að afdrifum Hauks.

Katrín Jakobsdóttir, forsætisráðherra, sagði á sínum tíma að málið væri í algerum forgangi hjá utanríkisráðuneytinu. Hún ræddi meðal annars mál Hauks við Angelu Merkel, kanslara Þýskalands, þegar þær hittust í mars árið 2018.

Guðbjörn Dan Gunnarsson, móðurbróðir Hauks, auglýsti í dag eftir höfundi nafnlauss bréfs sem barst fyrirtæki hans. Í samtali við Vísi segir Guðbjörn að bréfið hafi beðið hans á skrifstofunni þegar hann kom í sumarfríi og að hann viti því ekki hvenær það barst.

Bréfritari segist hafa starfað í utanríkisráðuneytinu þegar mál Hauks kom upp og heldur því fram að málið hafi verið þaggað niður þar. Guðbjörn segir bréfritarann nafngreina starfsmann ráðuneytisins sem eigi að hafa unnið að því að kæfa málið. Lýsir Guðbjörn efnis bréfsins sem sláandi.

Hann vill aftur á móti ekki upplýsa frekar um innihalds béfsins þar sem það er nafnlaust. Því brá hann á það ráð að auglýsa eftir bréfritaranum og heita honum fullri nafnleynd.

„Mér er ekki vel við það að birta nafnlausar upplýsingar. Ég held í vonina að það verði haft samband. Ef ég tel þær upplýsingar fullnægjandi verður það birt,“ segir hann. 

Guðbjörn segir bréfið staðfesta að mörgu leyti það sem fjölskylduna hafi grunað að pólitískar skoðanir Hauks hafi haft áhrift á hvernig utanríkisráðuneytið tók á máli hans. Hann vilji þó fá staðfestingu á áreiðanleika upplýsinganna.

„Ég trúi öllu því sem kemur fram í bréfinu en það er hins vegar möguleiki á því að þetta bréf sé skrifað til að koma pólitísku höggi á þennan aðila sem er skrifað um. Það er möguleiki og ég vil ekki taka þátt í því,“

Því vilji fjölskyldan reyna að fá staðfestingu á því að bréfritarinn sé sá sem hann segist vera.

Sveinn Guðmarsson, upplýsingafulltrúi utanríkisráðuneytisins, segist í samtali við Vísi hafa séð Facebook-færslu Guðbjörns.

„Við höfum ekki séð þetta bréf og það virðist nafnlaust. Meira er ekki um málið að segja.“


Tengdar fréttir

Gleymdist að geta Hauks í skýrslu þjóðaröryggisráðs

Stjórnvöld hafa beðist afsökunar vegna villu í skýrslu þjóðaröryggisráðs þar sem fjallað er um hryðjuverkaógn. Í skýrslunni var ranglega tekið fram ekki sé vitað um neina Íslendinga sem hafi tekið beinan þátt í aðgerðum bandamanna gegn ISIS-hryðjuverkasamtökunum í Írak og Sýrlandi.

Tölva Hauks á leið til Íslands

Tölva Hauks Hilmarssonar er komin til Evrópu. Móðir Hauks vonast til að tölvan rati til Íslands á næstunni.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.