Síðustu hermenn NATO yfirgefa Bagram-herstöðina

Gunnar Reynir Valþórsson skrifar 2. júlí 2021 08:43

Síðustu hermennirnir úr röðum Bandaríkjahers og annarra NATO ríkja hafa nú yfirgefið Bagram herflugvöllinn í Afganistan. Völlurinn hefur verið aðalbækistöð herliðsins allar götur síðan stríðið gegn Talíbönum og al-Kaída hófst fyrir um tuttugu árum síðan.

Brottflutningur herliðsins gæti verið merki um að síðustu NATO hermennirnir hverfi fyrir fullt og allt frá Afganistan, að því er breska ríkisútvarpið segir.

Joe Biden Bandaríkjaforseti hefur gefið það út að síðustu Bandaríkjamennirnir verði farnir fyrir ellefta september næstkomandi sem er táknræn dagsetning í ljósi þess að innrásin var upphaflega gerð í kjölfar hryðjuverkaárásanna í Bandaríkjunum ellefta september 2001.

Sumir hafa þó gagnrýnt þessa ákvörðun í ljósi þess að hersveitir Talíbana hafa gert strandhögg víða í Afganistan síðustu mánuði og nálgast nú höfuðborgina Kabúl.

Afganistan Bandaríkin NATO Hernaður

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.