Neytendur

Slökkva á 156 götu­hleðslum í borginni og kenna Ísorku um

Atli Ísleifsson skrifar
Götuhleðsla á bílastæði við Laugardalslaug í Reykjavík.
Götuhleðsla á bílastæði við Laugardalslaug í Reykjavík. ON

Orka náttúrunnar hyggst taka strauminn af þeim 156 götuhleðslum sem fyrirtækið hefur sett upp um víða borg. Félagið sér sig knúið til þess í kjölfar kvörtunar Ísorku yfir að hleðslurnar væru opnar hverjum sem er og það gjaldfrjálst. Slökkt verður á stöðvunum 28. júní.

Frá þessu segir í tilkynningu frá Orku náttúrunnar. Segir að óvíst sé hvenær hægt verði að hleypa straumi á þær að nýju.

Í tilkynningunni er framvinda málsins rakin og segir að Reykjavíkurborg hafi á sínum tíma boðið út uppsetningu og rekstur götuhleðsla og tekið tilboði frá ON sem bauð lægst í verkefnið.

„Úrskurðarnefnd útboðsmála komst síðan að þeirri niðurstöðu eftir kæru Ísorku að Reykjavíkurborg hefði átt að bjóða verkið út á evrópska efnahagssvæðinu. Ekki var tekið undir önnur sjónarmið Ísorku sem þó voru fjölmörg.

Samkvæmt niðurstöðu úrskurðarnefndar er ON hvorki heimilt að taka gjald fyrir afnot af götuhleðslunum né að sérmerkja bílastæðin sem þær standa við. Í stað þess að slökkva á hleðslunum og þannig gera rafbílaeigendum sem treysta á umræddar hleðslur erfitt fyrir ákvað ON að hætta að rukka og taka niður merkingar við stæðin. Hleðslur yrðu þá aðgengilegar öllum á meðan næstu skref væru metin. Þannig hlítti ON niðurstöðunni en styddi áfram það mikilvæga verkefni sem orkuskiptin í samgöngum er.

Ísorka hefur nú aftur sent kvörtun til kærunefndarinnar, nú vegna þess hvernig ON hefur brugðist við þeirri niðurstöðu hennar að Reykjavíkurborg hefði átt að bjóða út á evrópska efnahagssvæðinu.

Í bréfi sem barst ON frá Reykjavíkurborg í morgun segir að vegna athugasemda Ísorku telji borgin nauðsynlegt að óska eftir því að ON rjúfi straum til umræddra hleðslustöðva.

Þá segir einnig að Reykjavíkurborg hafi farið þess á leit við kærunefnd útboðsmála að réttaráhrifum úrskurðarins verði frestað,“ segir í tilkynningunni.

Sérstakar aðstæður réttlæta beiðni um frestun

Reykjavíkurborg hefur sömuleiðis sent frá sér tilkynningu vegna málsins og telur að sérstakar ástæður réttlæti að beiðni um frestun á réttaráhrifum verði tekin til greina.

  • „Aðalskylda samningsins um uppsetningu hleðslustöðva hefur þegar verið uppfyllt að næstum öllu leyti og þjónusta verið við borgarbúa til samræmis við ákvæði samningsins um nokkurt skeið. Því er niðurstaða úrskurðarins verulega íþyngjandi fyrir aðila máls og íbúa og gesti Reykjavíkur.
  • Fyrirséð er að óvirkni samningsins, jafnvel þótt hún kunni einvörðungu að vara um skamman tíma, mun leiða til þess að eigendur rafbíla sem hafa fjárfest í þeim í trausti þess að eiga auðvelt aðgengi að hraðri hleðslu þeirra eiga nú erfiðara um vik með að nýta sér þá.
  • Ákvörðun kærunefndar útboðsmála frá 22. október sl. þar sem kröfu Ísorku ehf. um að umrætt útboð yrði stöðvað um stundarsakir var hafnað. Báðir samningsaðilar, Reykjavíkurborg og ON, voru því í góðri trú um að halda áfram með að efna samninginn sem komst á í kjölfar hins kærða útboðs.

Af hálfu Reykjavíkurborgar stendur yfir vinna við að kanna grundvöll þess að láta reyna á lögmæti úrskurðarins sem eins og áður hefur komið fram, lýtur að áætlaðu verðmæti samnings, kostnaðaráætlun, og hvort bjóða hefði átt út sérleyfissamning á Evrópska efnahagssvæðinu í stað almenns útboðs sem fór fram innanlands. Samhliða því er unnið að undirbúningi nýs útboðs,“ segir í tilkynningunni.


Tengdar fréttir

Hleðsla rafbíla í áskrift

Orka náttúrunnar hefur kynnt til sögunnar nýja lausn á Íslandi þegar kemur að hleðslu rafbíla við heimahús, hvort sem er einbýli eða fjölbýli.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×