Ríkið sýknað af milljónakröfu Sigurðar G. í skattamáli

Ferill Sigurðar er vægast sagt fjölbreyttur og er raunar rakinn í þaula á heimasíðu hans. Lögmaðurinn hefur meðal annars starfað sem forstjóri Norðurljósa, stjórnað kosningabaráttu Ólafs Ragnars Grímssonar forseta Íslands og keypti DV á sínum tíma með fjármagni frá Björgólfi Thor Björgólfssyni fjárfesti.

35 millljónir sem mynduðu skuld

Sigurður hefur einnig verið í forsvari fyrir Dýrfisk ehf. sem rekur fiskeldi í Dýrafirði og Tálknafirði. Það voru úttektir Sigurðar úr einkahlutafélaginu Sigurður G. Guðjónsson ehf., í kjölfar sölu félagsins á rúmlega 50 prósenta hlut í Dýrfisk á 260 milljónir króna, sem ríkisskattstjóri hafði til rannsóknar.

Var það mat ríkisskattstjóra að Sigurður hefði alls tekið tæplega 43 milljónir króna út úr félaginu árið 2011 án þess að gera grein fyrir úttektunum á skattframtali. Það hefði hann átt að gera sem framkvæmdastjóri og starfsmaður félagsins. Um var að ræða eina milljón sem var greidd inn á VISa skuld Sigurðar, tvær milljónir sem fóru inn á bankareikning hans og ein milljón sem greidd var dóttur hans.

Þá segir í dómnum að 35 milljónir króna hafi í bókum félagsins verið ranglega færðar sem framlag Sigurðar til félagsins. Þannig hafi myndast skuld við Sigurð. Og að lokum tæpar þrjár milljónir króna af söluverði Dýrfiskjar ehf sem hafi verið færðar á bankareikning stefnda.

25 prósenta álag

Vegna þessa hækkaði stofn Sigurðar til tekjuskatts og útvars um 43 milljónir króna gjaldárið 2012 auk þess sem ríkisskattstjóri bætti 25 prósenta álagi, tæplega 11 milljónum króna, á vanframtalinn stofn.

Sigurður G. taldi rannsókn skattayfirvalda ófullnægjandi. Hann hélt því fram að hann ætti peninga inni hjá félaginu, hann hefði persónulega stutt við félagið Dýrfisk og Sigurður hefði sjálfur greitt skuldir félagsins Sigurðar G. Guðjónssonar ehf við önnur félög. Skattrannsóknarstjóri féllst ekki á þessar skýringar við rannsókn sína.

Þá taldi Sigurður að skattrannsóknarstjóri hefði átt að ræða við Björgvin Þorsteinsson hæstaréttarlögmann sem hefði getað staðfest að Sigurður hefði átt að fá 10,5 milljónir króna úr uppgjöri Dýrfisks ehf. Ríkisskattstjóri taldi ekki ráðið af gögnum málsins hvernig hlutur Björgvins í fyrrnefndu uppgjöri tengdist málinu.

Þarf að greiða 800 þúsund í málskostnað

Héraðsdómur féllst ekki á að rannsókn skattrannsóknarstjóra hefði verið ófullnægjandi eða að niðurstaða hennar hefði verið efnislega röng. Sigurður hefði í gegnum allt ferlið getað lagt fram gögn og komið á framfæri sjónarmiðum sínum. Skýrslutaka yfir Björgvini Þorsteinssyni hefði ekki breytt neinu.

Þá taldi héraðsdómur Sigurð ekki hafa sýnt fram á að skýringar hans væru réttar miðað við fyrirliggjandi gögn. Þvert á móti styðji gögnin ekki málatilbúnað Sigurðar. Var íslenska ríkið því sýknað af öllum kröfum Sigurðar sem þarf að greiða 800 þúsund krónur í málskostnað.