Golf

Þeim gamla fataðist flugið en McIlroy fór mikinn

Valur Páll Eiríksson skrifar
McIlroy var bestur á vellinum í gær. Nær hann að fylgja því eftir í dag?
McIlroy var bestur á vellinum í gær. Nær hann að fylgja því eftir í dag? Getty Images/Harry How

Þrír kylfingar deila forystunni á Opna bandaríska meistaramótinu í golfi, US Open, fyrir lokahringinn sem leikinn verður á Torrey Pines-vellinum í San Diego í Kaliforníu í dag. Staðan er gríðarjöfn á toppnum.

Kylfingarnir þrír sem leiða eiga misjafnan feril að baki, en allir eru þeir á fimm höggum undir pari vallar. Þrítugi Kanadamaðurinn Mackenzie Hughes er þar á meðal, en hann hefur ekki komist í gegnum niðurskurðinn í hin þrjú skiptin sem hann hefur tekið þátt á mótinu. Hann setti niður langt pútt á 13. braut fyrir erni í gær og lék alls á 68 höggum, þremur undir pari.

Russell Henley, sem leiddi mótið eftir bæði fyrsta og annan hring, viðheldur því.  Hann fór hring gærdagsins á pari og er því sem fyrr á fimm undir parinu. Hinn 48 ára gamli Richard Bland, sem leiddi ásamt Henley eftir annan hringinn, náði ekki að fylgja því eftir í gær þar sem hann fór hringinn á 77 höggum, sex yfir pari vallar, og hrundi niður í 21.-28. sæti mótsins.

Þá er Suður-Afríkumaðurinn Louis Oosthuizen einnig í forystu, en sá virðist ítrekað vera í kringum toppinn á risamótum. Hann hefur endað annar á öllum fjórum risamótunum; á Opna bandaríska 2015, Masters-mótinu 2012, Opna breska 2015 og á PGA-meistaramótinu bæði 2017 og í ár. Oosthuizen fékk örn á lokaholunni í gær og fór hringinn þannig á einu undir pari.

Ekki er langt niður í fleiri öfluga menn sem geta vel boðið efstu mönnum birginn á lokahringnum. Rory McIlroy og Bryson DeChambeau eru á þremur undir pari og Scottie Scheffler, Jon Rahm og Matthew Wolff koma svo næstir á tveimur undir parinu.

McIlroy átti frábæran hring og fékk lægsta skor sem fengist hefur á þriðja hring í sögu US Open. Sá norður-írski fór hringinn á 67 höggum, fjórum höggum undir pari vallar, sem skilaði honum hátt upp töfluna.

Lokahringur US Open hefst klukkan 16:00 í dag á Stöð 2 Golf.

Öll stærstu golfmótin eru á Stöð 2 Golf en upplýsingar um útsendingar má finna hér. Stöð 2 Golf kostar 3.990 krónur á mánuði en er einnig hluti af Sportpakkanum. Helgarpassa að Stöð 2 Golf má kaupa á kerfum Vodafone.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.