Fær um níu milljónir frá Arion banka

Snorri Másson skrifar 18. júní 2021 21:52

Arion banki tapaði gegn fyrrverandi starfsmanni í Landsrétti. Vísir

Landsréttur hefur dæmt Arion banka til að greiða fyrrverandi starfsmanni bankans um níu milljónir króna vegna fyrirvaralausrar uppsagnar árið 2016. Uppsögnin var að mati starfsmannsins ólögmæt og meiðandi í hans garð, en bankinn taldi starfsmanninn hafa brotið alvarlega gegn starfsskyldum sínum.

Starfsmaðurinn vann á árunum 2010 til 2015 fyrir annað félag samhliða störfum sínum fyrir bankann, þvert á ráðningarsamning. Bankinn sagði starfsmanninum upp í tengslum við rannsókn lögreglu á meintum glæpum hans og bar því einnig við að hann teldist hafa brotið ráðningarsamninginn með því einu að starfa fyrir annað félag.

Einnig taldi bankinn starfsmanninn hafa notið óeðlilegra kjara í viðskiptum sínum við AFL sparisjóð, sem var í eigu bankans. Þannig taldi bankinn starfsmanninn ekki aðeins hafa farið á svig við samninginn með því að starfa fyrir annað félag, heldur að starfsmaðurinn hefði beinlínis gerst sekur um refsiverða háttsemi.

Starfsmaðurinn var ekki ákærður í tengslum við meinta refsiverða háttsemi á sínum tíma og málið var látið niður falla eftir handtöku og rannsókn.

Arion banki vildi að fyrirvaralaus uppsögnin yrði réttlætt með því að starfsmaðurinn hafi notið sérkjara hjá sparisjóðnum í störfum sínum fyrir annað félag. Dómurinn féllst ekki á að skýrt hafi verið að hann hafi notið þeirra kjara, þannig að þau sjónarmið voru ekki tekin gild. Því þurfti Arion banki að greiða uppsagnarfrestinn.

Héraðsdómur hafði áður sýknað Arion banka af kröfum starfsmannsins um launin. Landsréttur sneri því við eftir að starfsmaðurinn áfrýjaði málinu.

Íslenskir bankar Dómsmál Vinnumarkaður

Tengdar fréttir

Rannsókn á ís vegna veikinda sakbornings

AFL sparisjóður er í dag hluti af Arion banka, en þegar sparisjóðurinn sameinaðist bankanum var farið að skoða bókhald sjóðsins og vaknaði þá grunur um misferli.

29. mars 2017 07:00

Rannsókn á meintum fjárdrætti á Siglufirði er nú á lokametrunum

Rannsóknin hafði legið á ís vegna alvarlegra veikinda Magnúsar Jónassonar.

9. janúar 2018 06:00

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.