Handbolti

„Hann er bara pabbi minn, ég lít ekki á hann sem einhverja stjörnu“

Ingvi Þór Sæmundsson skrifar
Einar Þorsteinn Ólafsson er einn af óvæntustu stjörnum tímabilsins.
Einar Þorsteinn Ólafsson er einn af óvæntustu stjörnum tímabilsins. stöð 2 sport

Einar Þorsteinn Ólafsson var hetja Valsmanna í seinni leiknum gegn Eyjamönnum í undanúrslitum Olís-deildar karla á föstudaginn. Hann stal boltanum í lokasókn ÍBV og sá til þess að Valur fór áfram í úrslitin um Íslandsmeistaratitilinn.

Einar mætti í settið hjá Seinni bylgjunni eftir leikinn á Hlíðarenda. Valsmenn töpuðu honum, 27-29, en unnu einvígið, 55-54 samanlagt.

„Mér hefur aldrei liðið svona áður. Þetta er bara geggjað, eftir frekar eðlilegan leik hjá mér, ekkert sérstakan, að geta stolið honum manni færri. Þetta hefði ekki getað endað betur,“ sagði Einar. Hann var að sjálfsögðu spurður út í lokasókn ÍBV þar sem hann stal boltanum.

„Ég var reyndar alveg frosinn í leikhléinu. Ég gat ekki hreyft mig en svo var flautað og ég gerði það sem ég geri á æfingum og það heppnaðist,“ sagði Einar og bætti við að ekki hafi verið lagt upp með að hann ryki út úr vörninni og til að stela boltanum.

Var rosalega lélegur á yngri árum

Einar er á sínu fyrsta tímabili í meistaraflokki Vals. Ekki er langt síðan hann æfði körfubolta eftir að hafa hlaupið á vegg í handboltanum. Hann segir margt í körfuboltaþjálfuninni hjálpi honum í handboltanum.

„Ég hef alltaf verið handboltastrákur. Eitt árið gekk mér ekkert vel í handboltanum, hafði ekkert þroskast og var rosalega lélegur á yngri árum,“ sagði Einar. 

„Ég ákvað að prófa körfuboltann, var alveg góður og lærði ógeðslega mikið þessi tvö til þrjú ár sem ég æfði, varnarstaðsetningar og fótavinnu. Svo varð ég betri í handbolta. Ég lærði rosalega mikið og væri ekki sami leikmaður ef ég hefði ekki farið í körfuna.“

Eins og flestir vita er Einar sonur Ólafs Stefánssonar, besta handboltamanns sem Ísland hefur alið.

„Hann er bara pabbi minn, ég lít ekki á hann sem einhverja stjörnu. Markmiðið er að ná honum sóknarlega og ég er nú þegar orðinn betri en hann varnarlega,“ sagði Einar og ítrekaði svo að hann væri að grínast.

Klippa: Seinni bylgjan - Viðtal við Einar Þorstein

Einar segist ekki hafa búist við því að fá svona stórt hlutverk í Valsliðinu fyrir tímabilið.

„Nei, ég var bara heppinn að leikmenn meiddust og ég fékk tækifæri. Planið fyrir tímabilið var að ég myndi æfa, lyfta hjá styrktarþjálfara og borða endalaust af mat,“ sagði Einar.

Hann stefnir hátt og vill komast eins langt og mögulegt er. „Ég myndi ekki segja að ferilinn minn hafi heppnast ef ég enda í Grill deildinni eða eitthvað eftir tíu ár. Ekkert diss á Grill deildina en ég vil meiri hluti. Ég vil verða besti leikmaður sem ég get orðið,“ sagði Einar.

Fyrri leikur Vals og Hauka um Íslandsmeistaratitilinn hefst klukkan 19:30 í kvöld og verður sýndur beint á Stöð 2 Sport. Upphitun Seinni bylgjunnar fyrir leikinn hefst klukkan 18:45.


Seinni bylgjan er uppgjörsþáttur Stöðvar 2 Sports um Olísdeildir karla og kvenna í handbolta og er á dagskrá öll mánudagskvöld. Upptökur af þættinum má nálgast á sjónvarpsvef Stöðvar 2. Olísdeildin er hluti af Stöð 2 Sport Ísland.


Tengdar fréttir

Hákon Daði: Stutt í gleðina og stutt í sorgina

Hákon Daði Styrmisson lék sinn síðasta leik fyrir ÍBV í bili þegar liðið vann Val í kvöld, 27-29. Hann, eins og aðrir Eyjamenn, var samt sár og svekktur í leikslok.

Snorri Steinn: Man ekki hvernig mér leið, örugglega ekki vel

„Ég man það ekki, örugglega ekki vel,“ svaraði Snorri Steinn Guðjónsson, þjálfari Vals, aðspurður hvernig honum hefði liðið í lokasókn ÍBV. Eyjamenn voru tveimur mörkum yfir fyrir hana og hefðu farið í úrslit um Íslandsmeistaratitilinn ef þeir hefðu skorað úr henni.




Fleiri fréttir

Sjá meira


×