Hraunsfjörður farinn að gefa flottar bleikjur

Hraunsfjörður er mikið uppáhald margra veiðimanna enda er vatnið oft mjög gjöfult og í því er væn bleikja. Við höfum verið að fá fréttir af mönnum sem hafa farið þangað síðustu daga og hefur veiðin verið hin fínasta. Ein og ein smábleikja kemur með á fluguna en uppistaðan er væn og falleg 2-3 punda bleikja.

Veiðin er mest frá miðju vatni og að hrauni og virðist sama á hvorum bakkanum menn eru að veiða, það virðist vera fiskur um allt. Það er ekki óalgengt að heyra af veiði uppá 5-10 bleikjur yfir part úr degi en það skal þó ekki skilja það þannig að þetta sé auðvelt. Þeir sem þekkja vatnið geta veitt vel en það getur tekið nokkurn tíma að læra vel á það en það á svo sem við um flest öll vötn þar sem bleikju er að finna.