Veiðitímanum að ljúka í vötnunum

Veiði er lokið í flestum vötnum en þó ekki öllum og sum þeirra geta gefið góða veiði síðustu dagana.

Veiði er lokið í Þingvallavatni og Elliðavatni sem dæmi en það mátti veiða til 15. september.  Það hefur þó ekki komið í veg fyrir að einhverjir hafi bleytt færi í vatninu en í gær voru til að mynda tveir veiðimenn við Öfugsnáða á Þingvöllum sem báru fyrir sig þekkingarleysi á veiðitímanum þegar þeir voru teknir tali.  Handhafar Veiðikortsins geta séð inná heimasíðu kortsins veiðitímann í öllum þeim vötnum sem tilheyra kortinu og því til lítils að bera þessari afsökun fyrir sig.

Þau vötn sem er vert að kíkja í á þessum tíma má til dæmis nefna Hraunsfjörð en þar er veitt til 30. september og getur þessi tími verið ágætur svo lengi sem það virðar vel.  Í Haukadalsvatni er veitt til septemberloka og þar veiðist oft ágætlega af sjóbleikju þó langt sé liðið á september.  Það er því vert að skoða hvort eitthvað af þínum vötnum sé ennþá opið og þá sérstaklega af það er urriði í vatninu.  Eitt af þeim vötnum sem getur til að mynda gefið stóra urriða á þessum tíma er Kleifarvatn á Reykjanesi.  Í ljósaskiptunum kemur stóri urriðinn úr dýpinu og uppá grynnra vatn í ætisleit.  Það hefur líka veiðst ágætlega alveg fram í myrkur og það er vel þess virði að láta reyna á það því þetta eru urriðar sem oft eru í kringum 10-15 pund.