Bitcoin löggiltur gjaldmiðill í El Salvador

Árni Sæberg skrifar 9. júní 2021 11:42

Nú er hægt að versla í matinn með Bitcoin í El Salvador. EPA/SASCHA STEINBACH

Löggjafarþing El Salvador samþykkti í dag frumvarp um löggildingu Bitcoin sem gjaldmiðils. El Salvador er fyrsta ríki heimsins sem löggildir Bitcoin. Forseti landsins, Nayib Bukele, barðist fyrir frumvarpinu og segir um söguleg tímamót að ræða.

Forseti El Salvador tilkynnti að landið myndi taka Bitcoin upp sem gjaldmiðil á Bitcoin ráðstefnu síðastliðinn laugardag. Hann sagði löggildingu rafmyntarinnar vera leið til að auka erlendar fjárfestingar í smáríkinu í mið-ameríku.

Forsetinn sagði enn fremur að ef einungis einu prósenti Bitcoin í heiminum yrði fjárfest í El Salvador, myndi verg landsframleiðsla landsins aukast um 25 prósentustig.

Bitcoin geri öllum kleift að stunda viðskipti

Fjárhagur El Salvador er ekki með góðu móti og landið reiðir sig að miklu leiti á peningasendingar frá Salvadorum sem búa erlendis. Vonir standa til að upptaka Bitcoin muni auðvelda millifærslur til landsins og draga úr kostnaði þeirra.

Smáforritið Strike verður notað til að halda utan um notkun Salvadora á Bitcoin. Því munu íbúar landsins einungis þurfa aðgang að snjallsíma til að nýta rafmyntina. Forseti landsins segir meginþorra íbúa ekki eiga hefðbundinn bankareikning og muni rafmyntin því auðvelda öll viðskipti í landinu.

Gengi Bitcoin sveiflukennt

Athygli vekur að El Salvador veiti Bitcoin löggildingu enda hefur hefur gengi rafmyntarinnar verið sveiflukennt allt frá því að henni var komið á laggirnar árið 2008.

Undanfarið hefur Bitcoin verið í frjálsu falli og er tímasetning El Salvador því í meira lagi áhugaverð.

Rafmyntir El Salvador

Tengdar fréttir

Bitcoin og aðrar rafmyntir í frjálsu falli

Rafmyntin Bitcoin hefur hrunið í virði í dag. Virði myntarinnar hefur lækkað stöðugt undanfarna fimm daga en botninn virðist taka úr þegar ráðmenn í Kína tilkynntu að herða ætti ólarnar á rafmyntum þar í landi.

19. maí 2021 15:31

Bálkakeðjur gjörbreyta landslaginu

Seðlabankar og stórfyrirtæki skoða hagnýtingu á bálkakeðjutækni með því að gefa út rafmyntir bundnar við lögeyri. Framkvæmdastjóri Rafmyntaráðs segir tæknina geta breytt fjármálakerfinu.

16. maí 2019 06:45

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir